Washington, Nailar:
U nongrah ktien ba kyrpang jong u President ka US, u Jared Kushner, hadien ba u la ioh ban iakynduh bad ki nongialam jong ka Hamas, u al ong ba ka jingleit jong u ka long kaba khlem sep-ei bad ba ka Hamas ruh ka kwah ban ïaid shakhmat ïa ka jingthmu ban wanrah noh ïa ka jingiabeit hapdeng jongka bad ka Israel. Ha kajuh ruh ka por, utei u heh ka US u la ong ba ka Hamas shen kan sa pyndem wait noh bad pynduh noh ïa baroh ki tiar thma jongka, kum shi bynta ban pyn treikam ïa ka jingiakut ba la dep ban kular da baroh arliang.
“Ngi lah ban iohi ïa ka jing seisoh… tang hapoh 30 sngi, kyrmen ba ngin sdang ban sei ïa ki katto- katne ki tiar ialeh, bad kyrmen, phi tip, ban pyndap ïa ki katto- katne ki bynta kiba dang thylli ruh kumjuh”, la ong u Kushner ha ka Fox News katba u dang don hapoh Tel Aviv.
Kitei ki jingkynthoh ki la mih ha ka por ba u Kushner bad u Netanyahu ki la mynjur ba uwei u heh shipai jong ka America un pynshisha ïa ka jingpynduh tiar thma jong ka Hamas, la ong uwei u heh sorkar jong ka Israel, namar ba u myntri rangbah duh u la ban jur ba kan ym don kano kano ka jingweng noh ki Israel na Gaza tad haduh katei ka por.
Katei ka jingiasngewthuh jingmut, ka pyni ïa ka jingpyrshang ba thymmai jong ka sorkar U President Donald Trump, ban pynhun ïa ka Israel, hadien ba u Netanyahu, uba iakynduh ïa ka jingiakhun ilekshon biang kaba tyngeh, u la kyntait paidbah ïa ka bynta ba khatduh jong ka jingthmu jong ka US, kaba thmu ban pynkut noh ïa ka thma Gaza kaba la pynjot.
U Kushner, uba dei u khun pyrsa jong u Trump bad uba dei u paralok ba la slem jong ka ïing jong u Netanyahu, u la ïakynduh ïa u nongïalam Israel ha Jerusalem shisngi hadien ba u la pynlong ïa ka jingïakren beit kaba duna bha ha Egypt bad ka Hamas, kaba la pynskhem paidbah ïalade ha katei ka jingthmu.
