Cairo, Nailar:
U nongai ktien jong ka US bad u pyrsa kurim jong u President Donald Trump, u Jared Kushner, u la pynlong ïa ka jingïalang kaba rit bad u heh jong ka Hamas, ha ka Sngi U Blei, ha ka jingpyrshang thymmai jong ka jingïadei ban wanrah ïa ka jingkiew ha ka jingsangeh thma ha Gaza, kaba la sahkut. U Kushner, un sa ïa kynduh ïa u myntri rangbah duh jong ka Israel, ha ka sngi Nyngkong.
Kane ka long ka jingiakren ba la thmu ban pynim ïa ka lad ba thymmai kaba don 15 tylli ki mat, kaba la kyrshan da ka US na ka bynta ka Hamas ban pyndem wait bad pynduh noh ïa ki tiar ïakhun jongka ha Gaza bad ba ka Israel ruh kan mih noh napoh u pud- u sam jong ka Palestine kaba la shah julor bun ha kane ka thma kaba la neh slem bha.
Namar la ong ba ki don kumba 2 million ngut ki briew ha katei ka nongbah Gaza bad ka jingtei biang ïa ka jaka ba la dap da ki briew kaba mynta la synshar bha da ki shipai Israel, palat 10 bnai naduh ba ka jingsangeh thma ka la pynkut noh ïa ki kam shipai kiba heh. Ka jingïakynduh hapdeng u Kushner, u paralok nongkit khubor u Steve Witkoff bad ki nongïalam ka Hamas ha Egypt ha u snem ba la dep ka la ïarap ban pynskhem ïa ka jingsangeh thma, ha kaba ka jingïaid shakhmat jong ka haduh mynta ka la sahkut halor ka mat ba kongsan jong ka jingpynduh tiar ïaleh jong ka Hamas.
Katei ka jingiakynduh kaba rit eh ha Egypt bad u Khalil al-Hayya jong ka Hamas, la pynthikna da uwei u heh jong ka thaiñ bad uwei u heh jong ka Hamas, baroh arngut ki la ioh ban iakren khlem da kwah ban pynpaw kyrteng namar ba kim shym la ioh bor ban iakren bad ki nongthoh khubor. U Kushner, u dei uwei na ki lai ngut ki nongkit khubor, kiba ïakynduh ïa u Al-Hayya, ha kaba ki ophisar na ki ri kiba pynïasuk, ka Egypt, Qatar bad Turkey ruh ki don lang hangtei.
U Myntri Rangbahduh jong ka Israel, u Benjamin Netanyahu, ha ka taiew ba la dep, u la kyntait ïa katei ka jingthmu kaba don 15 tylli ki mat, kaba pynpaw ïa ka jingpyrshah pyrshah ïa ka sorkar jong u Trump.
Mynta u Kushner, u Myntri Rangbahduh barim jong ka Britain, u Tony Blair bad u director jong ka Board of Peace, ba la thaw da ka US naka bynta ka jingiakren sangeh iasiat, U Nickolay Mladenov, ki la thmu ban ïa kynduh ïa u Netanyahu, ha ka Sngi Nyngkong, katkum ka tyllong khubor kaba tip bha ïa kitei ki jingthmu bad ka tyllong khubor jong ki riew shimet. Baroh arngut ki la kren khlem da kwah ban pynpaw kyrteng ban iakren ïa ka jingialang kaba khang.
Ha shwa ka jingïalang jong ka sngi Nyngkong, ki katto katne ki ri kiba donbor ha kane ka thaiñ kynthup ïa ka Saudi Arabia bad ka United Arab Emirates ki la pynmih ïa ka jingpynbna kaba pynrem ïa ka jingkyntait jong ka Israel ïa ka road map, da kaba ong ba “Ka Israel mynta ka kit ïa ka jingkitkhlieh ban khanglad ïa ki jingpyrshang ban wanrah ïa ka jingsuk ha Gaza.” Kiwei pat kiba la iasoi ki kynthup ïa ka Jordan, ka Pakistan, ka Indonesia bad ki nongpyniasuk ban sangeh iasiat.
Ka jingpynbna jong ki myntri bar ri ka la khot ruh ïa ka Board of Peace bad ïa ka US ban shim “ki lad ki lynti kiba kyrkieh bad kiba skhem” ban khanglad ïa kano kano ka seng ban khanglad ïa ka jingpyntreikam ïa katei ka jingthmu.
Ka jingïakynduh jong u Kushner bad u nongïalam ka Hamas ka thmu ban pynthikna ïa ka jingkohnguh jong ka kynhun lehnoh ha ka road map, khamtam eh ban pynduh tiar ïaleh, shwa ban ïakynduh ïa u Netanyahu, ong une u heh jong ka thaiñ.
U heh jong ka Hamas u la ong ba ka kynhun ka la aiti bad ka ap ïa ki nongpynïasuk ban sdang ïa ka por ïakren kaba 14 sngi ban thaw ïa ka por ban pyntreikam. Kata ka por ka donkam ïa ka jingmynjur jong baroh ki liang ïa ka road map ban sdang.
Une u heh jong ka Hamas u la ong ruh ba u nongïalam ka Hamas u la dawa na ka Israel ba kan sangeh noh ïa ki jinghiar thma jong ka ïa ka Gaza bad ban weng noh sha kaba la khot u “yellow line” uba phiah ïa ka jaka shwa ban sdang ban pyntreikam. Ia u lain uba saw ym shym la batai thikna satia. Ki shipai Israel ki la iaid palat ïa ka bad mynta ki la synshar kumba 60 percent ïa ka Gaza.
