Tehran, Nailar:
U Nongïalam ba ha khlieh duh jong ka Iran, u Mojtaba Khamenei, u la thung ïa u General jong ka Revolutionary Guards, u Ali Abdollahi, kum u khlieh duh jong ka tnat shipai katei ka ri ha ka taiew ba la dep, ha kaba, u la pynskhem ruh ïa u nongïalam bathymmai jong ki shipai Guards, da kaba ai bor kyrpang ruh ïa u ba un synshar bad pyniaid ïa ka tnat shipai jong ka ri.
U Abdollahi mynshwa u la ïalam ïa ka Khatam al-Anbiya, ka kynhun shipai pdeng jong ka Iran kaba la bynshet ban pynïaid ïa ki kam.
Ka kyrwoh na ka website jong u Khamenei ka la pynbna ba “Ïa u Major General Ali Abdollahi la thung kum u heh duh jong ki shipai. U Brigadier General Ahmad Vahidi ruh la thung kum u Commander-in-Chief jong ka Islamic Revolutionary Guard Corps ryngkat ka kyrdan Major General.”
Kitei ki arngut ki mihkhmat ïa ki jingthung shipai ba nyngkong eh jong u Khamenei naduh ba la jied ïa u kum u nongïalam ba ha khlieh duh ha kaba sdang jong ka thma Middle East hadien ka jingïap jong u kpa jong u ha ki jinghiar thma jong ka US bad ka Israel.
U Abdollahi u la pynmih ïa ki jingbyrngem thma ha ka jingïaid jong ka thma, da kaba maham ïa ki para marjan jong ka thaiñ ha kaba sdang jong une u bnai ba “kano kano ka ri kaba ïeng ban iasnoh kti lang bad ki nongleh kam sniew ba shyrkhei jong ka America, kan shah pyn-um ha ki thy-lliej ding jong ka thma.”
