Turkey, Nailar:
U President ka Turkey, u Tayyip Erdogan, ha ka jingiakren phone bad u President ka US- u Donald Trump, u la kyntu ïa ka US ba ka dei ban pyn-urlong ïa ka jingiakren ïa pynbeit bad ka Iran bad ban pynkut noh ïa katei ka jingiakynad hapdeng kitei ki arliang mamla bad ha kajuh ruh ka por u la tyrwa ïa ka kti jingïarap na ka liang jong ka Turkey lada ka US ka kwah ban leh ïa kata.
Ka Turkey, kaba don ïa ka kynhun shipai kaba ar ha ka NATO bad kaba don ha khappud bad ka Iran, ka la pyrta bunsien ban pynkut noh ïa katei ka thma. Ka la pynneh ïa ka jingiadei kaba jan bad ka America, Iran, bad ki nongpyniasuk kum ka Pakistan bad Qatar, katba ka trei ruh kum ka nongpyniasuk hapdeng ki arliang mamla.
“U Erdogan u la pynpaw ba ka long kaba kongsan bha ban leh ïa kaba bha tam jong ka jingïadei ha kaba ïadei bad ka jingïakynad hapdeng ka Iran bad ka America, ba ngi kyrmen ba ka jingïakren kan ïai bteng, bad ba ka Turkey kan ïai bteng ban kyrshan ïa ki jingpyrshang ban ïasuk,” ong ka tnat president ha ka kyrwoh.
Kane ka jingkhot ka long hadien ba u heh ophisar jong ka Iran u la ïathuh ha ka Reuters kham mynshwa ha ka sngi Nyngkong ba ka Iran kan kylla sha ka rukom leh shipai kaba “hiar thma pura” namar ba ki jingpyrshang ban ïakren ban pynkut noh ïa ka thma ki la sahkut, namar ba ka Washington ka la kyntait ban pynjlan ïa ka jingïateh kular ban sangeh thma shipor.
Ka jingïaid shaphrang ban sdang biang ïa ka jingïaid jong ki lieng kit umphniang lyngba ka duriaw bah Hormuz ruh ka la sahkut.
Ka Turkey ka la kynthoh ïa ka jinghiar thma jong ka US bad Israel ïa ka Iran, ha kajuh ka por ka pynrem ruh ïa ki jinghiar thma jong ka Iran ïa ki jylla jong ka Gulf bad ka khot ruh ban plie biang ïa kane ka duriaw ba kongsan.
Ha ka sngi Nyngkong, u myntri kam bar ri jong ka Turkey, u la iakren ïa ka jingplie biang ïa ka strait bad ka jingbteng ïa ka jingsangeh iasiat bad u paralok jongu na Iran.
Ka tnat president ka la bynrap ba u Erdogan bad u Trump ki la ïakren ruh halor ka jingïadei hapdeng ki arliang mamla, ka thma ha Gaza, bad ka jingïateh kular ïada ri ba la soi hapdeng ka Turkey, Saudi Arabia, bad ka Pakistan, da kaba bynrap ba u nongïalam ka Turkey u la ïaroh ïa kane ka jingïateh kular kum ka dak jong ka “jinglong kaba skhem” na ka bynta ka jingshong shngaiñ bad ka jingshngaiñ ha ka thaiñ.
