Washington, Nailar:
Katkum ki khubor, la iathuh ba ka Harvard University, kawei na ki skulbah kaba la paw nam tam, la ong ba ha kane ka por pat katei ka skul bah ka la mynjur ban siew ïa ka jingshah daiñ kuna kaba haduh 507 Klur tyngka, halor ka jingbna khubor ba u heh barim katei ka skulabah, u la pyniaid kam ïa ki metiap jong ki briew kiba don ha katei ka skulbah bad u die ïa ki dkhot met jongki ban ioh nong ïalade shi met. Ia utei u heh barim la ithuh kum u Cedric Ledge, 58 snem ka rta bad la pynngat ïa u hapoh ki kyndon pynkheiñ aiñ, kiba u la hap ban shong patok haduh 8 snem bad la pynngat kyndon ïa u ha u Nohprah jong u snem 2025 ba la leit.
U Dean jong ka HMS George Daley bad u Dean jong ka Medical Education u Bernard Chang ki la ong ba ka jingïapynbeit ha ka sngi Nyngkong kan ailad ïa ka Harvard bad ki nongujor ban kiar na ka ‘jingmudui kaba slem’.
Ka skul sumar ka la ong ha ka shithi ba yn sa thaw ïa ka pisa pynbeit pud kaba da ki klur tyngka na ka bynta ki longiing ynda la ai jingmynjur da ka iingbishar.
Ki longïing kiba shah ktah ki la sdang ban mudui pyrshah ïa ka Harvard ha ka por lyiur jong u snem 2023, tang hadien ba la pynngat mukotduma ïa u Lodge. Ki mukotduma ki la kynnoh ïa ka jingbym shimkhia, ka jingpynkhein ïa ka kamram jong u nongshaniah, bad ka jingpynshitom ïa ka jingsngew.
