Washington, Nailar:
U President ka United States, u Donald Trump, ha ka Sngi Balang u la byrngem tyngeh ïa kino- kino ki ri kiba leit ban ai jingkyrshan ïa ka Iran bad u la ong ba kum kita ki ri, kin shah pynngat da ki khajna kiba heh ha ka liang ka khaïi- pateng bad kane kan long ka jingpynshitomn halor ka jingleh bym suitñiew jongki ïa ka jingmaham jong u.
Ka jingpyrkhing bad ki jingbuh khajna kaba la nang jur ha ka liang ka khaïi- pateng, ka wan ha ka por ba ka thma ka la poi sha ka taiew kaba hynñiew khlem da don kano- kano ka jingpynkylla ha ka liang ka jingleit hiar thma.
Um shym la batai bniah ïa ka jingpynshitom kaba ki ri kin iakynduh, bad ym shym la kdew kyrteng ïa kawei pat lait na ka Iran.
Kane ka jingkren jong u President ka wan hadien shi taiew hadien ba u symbud pla tyngka u Scott Bessent u la ong ba ka US kan pynjari ïa ka jingpynkyrpang ha ka liang ka ioh ka kot ïa ka ri “kumba ka pyrthei kam pat ju ïohi mynno mynno ruh.”
Wat hapdeng ka jingsangeh dang shen ha ki jingbthei namding, ka Iran ka la bteng ban pynjari ïa ka jingkhang kaba treikam bha ïa ki lieng lyngba ka duriaw bah Hormuz, hadien ba ka jingïateh kular ba la buh lypa hapdeng ka US bad ka Iran ban plie biang ïa ka lynti ïaid ba kongsan ka la hap noh.
