Tehran, Nailar:
Ka Iran ka la kyntait jur ïa ka jingkynnoh jong ka United Arab Emirates ba ka Iran ka la ther ïa ki ‘namding ballistic missile sha ki bynta jong ka thaiñ Gulf, da kaba khot ruh ïa kane ka jingkynnoh “ka bym don nongrim” bad ka long kaba ktah jur ïa ka jingshaniah bad jingpyrshang ban wanrah ïa ka shongsuk- shongsaiñ hapoh katei ka thaiñ. Ka tnat kam bar ri jong ka Iran ka la ong ba kum kine ki “jingkynnoh ba khlem nongrim” dei ban kiar kum ka nongrim jong ka “jinglong para marjan kaba bha”.
Hynrei ka Iran, ka la maham, ba ka Strait of Hormuz- kaba ki jhad kiba mih na ki kad lieng jong ka UAE, ki dei ban ïaid lyngba ban mih na ka Gulf, kan dang khang tad haduh ba kan da poi sha ka jingïateh kular bad ka America.
Ha ka jingpynbna, u nongaiktien jong ka tnat kam bar ri jong ka Iran, u Esmail Baghaei, u ong ba ka Tehran, ka la kyntait ïa ka jingkynnoh jong ka UAE, da kaba ong ba kum kine ki jingpharep, ki pynthut ïa ka jingpyrshang ba dang ïaid sha khmat ban wanrah ïa ka jingsuk ha katei ka thaiñ.
Kane ka jingleh ka long pyrshah ïa ka nongrim jong ka jingïadei para marjan babha bad ka pynthut ïa ki jingpyrshang ba dang ïaid shakhmat ban pynskhem ïa ka jingshaniah hapdeng ki ri ka thaiñ bad ban khanglad ïa ka jingjur jong ka jingbymshngaiñ ha ka thaiñ,” ong u Baghaei ha ka kyrwoh ba la pynmih ha ka Telegram channel jong ka tnat.
Haba khot ïa ki ri ka thaiñ ban kiar na kaba kynnoh “ki jingkynnoh khlem nongrim” pyrshah ïa ka Tehran, u Baghaei u la ong ba ka jinglong jingman mynta ha Middle East ka la long lypa kaba jynjar namar kaei kaba u la batai kum ki jingleh jong ka America bad ka Israel pyrshah ïa ka jingsuk bad jingshngaiñ ha ka thaiñ.
