Washington, Nailar:
U heh Treasury jong ka US- u Scott Bessent, u la ong ba ka United States kan pynngat da ki kyndon kiba jwat haduh katta ïa ka Iran ha kane ka sien, ha kaba, la ngeit ba kane ka jingleh jong ka US, kan pynsuk ïa ka US ba kan ym khuslai than eh ïa ka jingphah shipai sha Iran.
Ka jingkren jong u Bessent ha ka Sngi Palei ka la long hadien ka jingbyrngem jong u Presi-dent Donald Trump ha ka sngi ba la dep shaphang ka “Thma ha ka liang ka ioh ka kot” bad ka jingmaham ïa ki jingktah ha ka liang ka ioh ka kot pyrshah ïa kano kano ka ri kaba ai jingkyrshan ïa ka Iran. Hynrei u Bessent u la kular ban ai jingpynshai halor kane, ha ka taiew ka ban wan.
Ka dor jong ka umphniang ka la kiew bun bha ha ka Sngi Thohdieng tang hapoh jong ki 3 taiew hadien jong kitei ki jingbyrngem ka US ban pynshitom ïa ka ioh – ka kot jong ka Iran, da kaba thmu ban pynkut jubor noh ïa ka thma kaba la neh haduh hynriew bnai kaba la pynsangeh ïa ki million barel umphniang jong ka ri Mihngi Pdeng.
“Ngam tip balei ka umphniang ka la mih halor kane”, la ong u Bessent ha ka CNBC. “Lada ngi leh ïa ka jingpynbor kaba heh tam ha ka liang ka ioh ka kot, te kata ka mut ba ka lah ban long ba kan ym don ka jingsdang biang kaba heh bha,” u la ong, da kaba pyndonkam ïa ka kyntien kaba thew ïa ka bor shipai.
Da ki hajar ngut ki la ïap ha katei ka jingïakynad, kaba la khring ïa ki ri jong ka Gulf bad kaba la pynkyndit ïa ki iew ki hat katba ka Iran ka la pynkhih ïa ka jinglah jong ka ban khanglad ïa ka jingkit lieng lyngba ka wahduid Hormuz – ka lynti um kaba kit kumba shi bynta na ka san bynta jong ka umphniang baroh kaba la khaii shwa u bnai February.
Ka US bad ka Iran ki la pynbna arsien ïa ka jingïateh kular ban sangeh thma, ha u bnai Risaw bad Rymphang, da kaba thmu ban pynphai biang ïa ka jingïaid laitluid jong ki liengsuiñ lyngba ka Hormuz ha ka lynti ban pynkut noh ïa ka jingïakynad, hynrei baroh ar ki la ïakhlad noh kloi.
