Washington, Nailar:
Katkum ki kaiphod ba la ioh lum, la iathuh ba u President jong ka America, U Donald Trump, u la bei pisa haduh $50,000 ha ka projek SpaceX jong u Elon Musk ha u bnai Jymmang, katkum ka jingpynbna paidbah halor ka pisa tyngka, kaba la ai ïa u ïa ka bhah pisa ha kawei ka kontraktor sorkar kaba heh, kaba la pyniaid da u nongai jingmut barim jongu.
La ong ba u la thied kumba $15,001 haduh $50,000 ki jingioh bynta ha ka 23 tarik u Jylliew, katkum ka jingpynbna pisa kaba u la soi ha ka 12 tarik u Nailar bad kaba la pynpaw paidbah ha ka 22 tarik u Nailar. Ka jingthied ka dei shi bynta jong palat 1,000 tylli ki jingkhaii stock ba u President u la leh ha u bnai Iaiong.
Ka SpaceX ka la pynlong ïa ka jingpynbna paidbah kaba nyngkong eh ha ka 12 tarik u Iaiong, kaba la pynpra ïa ki rekod jong ka IPO.
Ha ka jingpynbna sha ka Reuters, u nongaiktien jong ka White House, u Davis Ingle, u ong ba ki jaka ai pisa jong kiwei pat ki seng, ki pyniaid laitluid ïa ka kam jong u president bad ki pyni nuksa ïa ki “index ba la ithuh, kum ka Schwab 1000.”
“U President Trump lane uno uno u dkhot jong ka ïing jong u, um don kano kano ka jinglah ban bthah, ban pynkhih, ne ban ai jingmut ha kaba ïadei bad kumno la pynlut ïa ka portfolio lane ha kano ka por ba la thied ne die ïa ki jingbuh pisa,” ong u Ingle ha ka kyrwoh.
Ka jingbei tyngka jong u Trump ha ka SpaceX ka pyndap ïa ka jingiadei pisa kaba thymmai hapdeng u president bad ka kompeni rocket jong u Musk ha ka por ba ka bor synshar ka dang shim ïa ki rai kiba lah ban ktah ïa ka bha ka miat jong katei ka kompeni.
Ka SpaceX ka dei ka kompeni shipai jong ka US, bad bunsien ka pan jingmynjur na ki tnat sorkar pdeng. U Trump ha ka sngi Thohdieng u la bthah ïa ka kynhun jong u ban ïarap ban pynbun shibun ïa ka jingpynher ïa ki liengsuiñ sha suiñbneng na ka bynta ka khaii pateng jong ka US. Ka SpaceX ka dei ka nongialehkai kaba donbor ha kata ka bynta.
Ka Reuters kam shym la lah ban tip mardor ïa ka jingbun jong ka jingbei tyngka namar ba ki heh sorkar pdeng ki pyndonkam da ki range ban pynbna ïa ka dor jong ki mar ki mata jong ki ha ki phorm pynpaw pisa jong ki.
