Islamabad, Nailar:
Uwei u heh shipai ka Pakistan ha ka Sngi Nyngkong, u la pyndonkam bakla ïa ka bor jong u hapoh ka skulbah Sarhad University kaba don ha ka nongbah Islamabad jong ka ri Pakistan, ha kaba, u la shoh- la tied ïa ki khynnah pule kiba pynlong jingiakhih bad u la pyndonkam ruh ïa ka suloi ban siat ha katei ka jaka pule.
Ki nongïakhih ha kylleng ki thaiñ jong ka Pakistan, naduh ki surok jong ka Baluchistan haduh Khyber Pakhtunkhwa shaduh ki bynta jong ka PoJK ba la bat ïa ka Pakistan, ki la kam da ki taiew ba ka “jingshyrkhei” ba la pyllait paidbah halor jong ki, ka dei ka kam jong ki shipai jong ka Pakistan.
Ka Rawat Campus jong ka Sarhad University ka la sakhi ïa kane ka jingjia ha katei ka sngi bad kaba la pynsyier ïa ki riew paidbah namar ka jing pyndonkam bakla jong ki ‘riew don bor ïa ka bor khlem da burom ïa ki aiñ ki kyndon ba la buh.
Katkum ka jingiathuh jong ki nongsakhi ha katei ka jingjia, la ong ba ka kynhun ki samla pule ki dang iakhih da kaba suk pyrshah ïa u heh jong ka tnat jongki halor ka bai skul bad ka por long klas.
Katkum ki tyllong khubor, la ong ba ka heh jong ka tnat pule, ka Dr Aina, ka la poi ban pynjem ïa ki samla pule kiba dang shit rhem ha katei ka jingiakhih. Ha kaba, katto- katne ngut ki samla pule ki la kyntait ban kynran dien, ka la khot ïa la u lok, u Ophisar Shipai.
Ha kajuh ka por, ki tyllong khubor ki iathuh ba hadien ba ka video jong utei u ophisar shipai uba rah ïa ka suloi bad siat shalor suiñ bad la ong ba ka tnat shipai Pakistan ka la sdang ban tohkit bniah bad ban peit ïa ki kyndon ban pynshitom pyrshah ïa u bad halor katei ka jingpyndonkam bakla jong u ïa ka bor khlem ka aiñ.
