Tehran, Nailar:
Ka Iran ka la ong ba ka la sdang biang ïa ka jingïakren bad ka ri marjan jong ka Oman ban pynïaid ïa ka Strait of Hormuz namar ba ka ïakynduh ïa ka jingeh kaba jur ha ka liang ka ioh- ka kot na u President ka US, u Donald Trump, ha kane ka jingïakynad kaba kham jur.
Ka Iran bad ka Oman ki la ïakren man ka por la bun taiew halor ka jingpyllait ïa ka lynti ïaid lyngba ka lynti duriaw Hormuz, kaba pynïaid ïa kawei na ka san bynta jong ka jingshalan umphniang ha ka pyrthei baroh kawei shwa ba ka thma kan sdang ha u bnai Rymphang.
Kiba bun ki kam shalan mar da ki jhad na katei ka bynta jong ka duriaw, la dep khang naduh katei ka por ba ka US ka la iakynad bad ka Iran.
Kumta la ong ba kine ki ar tylli ki ri, ki la pynpaw ha ka Sngi Ba-ar ba ki la iakren halor ka lynti iaid jhad ba shipor ban iatreilang ïa ki kam kiba dei ban ïaid lyngba ïa katei ka bynta jong ka duriaw bad ban pynkuid ruh ïa ki par kiba don ha katei ka bynta.
U Trump, u la ong ba baroh ki par mar-poh khyndew ha katei ka duriaw, la dep ban pynkhuid, da kaba pynkynmaw biang ïa ki jingkren kiba u la kren mynshwa.
Watla ki jingïaleh pyrshah kiba jur hapdeng ka US bad ka Iran ki la nang duna bha, hynrei ki jingpyrshang jong ki nongïalam ban ïasoi ïa ka jingïateh kular ki la sahkut bad ka jingïaid lyngba ka lynti um ka dang long kaba ma.
Kawei ka jhad kit umphniang ka la shah lynshop ha ka sngi thohdieng da u bom bym lah ban ithuh bad ka la pynthut kumba 9 nautical mile (17 km) shaphang shatei lam mih ngi jong ka Ash Shishah jong ka Oman, kaba don ha ka jingkhang jong ka duriaw, ong ka United Kingdom Maritime Trade Operations.
Ha kaba kyrpang, ka US Secret Service ka la ong ha ka sngi thohdieng ba ka la tip ïa ka video kaba la pyni da ka telebishon jong ka sorkar Iran kaba iakren ïa ka jingthmu kaba lah ban mih ban pyniap ïa u khun khatduh jong u Trump, u Barron.
Ka video kaba lai minit, kaba la pyni da ka tv jong ka Iran, ka la ïakren halor ka buit kaba lah ban don ban pynïap ïa u Barron Trump, 20 snem ka rta, da kaba kynnoh ba la buddien ïa u bad kynnoh ba la tyrwa ïa ka bainong kaba $10 million na ka bynta ka jingpynïap ïa u.
