Washington, Nailar:
U Director ka CIA, U John Ratcliffe, ula leit sha Moscow khlem da pynbna satia, na ka bynta ban iakren bad ki heh jong ka Russia, la iathuh ka tnat pathai khubor CNN.
Shuwa ka jingleit jongu, ka US, ka la kyrpad ïa ka Ukraine, ba kan sangeh noh shipor ïa ka jing thombor da ki drone bad ki namding, ïa ka Moscow bad kiwei kiwei ki nongbah kiba don ha ka thain shatei lam mihngi jong ka Russia, ong ka khubor.
Katei ka jingkyrpad, ka kynthup ïa ka sngi Nyngkong haduh ka sngi thohdieng, bad la pyntip sha ka Kyiv, ba uwei u heh ophisar jong ka US, un leit sha Russia.
Kane ka jingleit jngoh kaba rieh ka wan ha ka por kaba donkam bha na ka bynta ka jingpyrshang jong ka Washington ban pynïajan ïa ka Moscow bad ka Kyiv sha ka jingïateh kular.
La ong ba dei ha ka step jong ka Sngi Ba-ar ba katei ka liengsuiñ shipai jong ka US Boeing C-17 Globemaster III ka la leit hiar ha ka kad liengsuiñ Vnukovo jong ka Russia.
Ka website kaba buddien ïa ki liengsuin Flightradar24, ka pyni ba katei ka liengsuin, ka i kumba ka la mih na Joint Base Andrews ha Maryland.
U nongaiktien jong ka tnat iada ri jong ka Latvia u la iathuh ha ka CNN ba la shah ïa katei ka liengsuin ban iaid ha katei ka thain. U nongaiktien u la ong ba katei ka liengsuiñ ka dei kaba la “pynbeit bha bad la ai bor ban treikam hapoh ka suiñbneng”.
