Washington, Nailar:
Ka SpaceX jong u Elon Musk, ha ka Sngi Balang ka la pynbna ïa ka jingthmu jongka ban tei ïa ka jaka treikam kaba shongdor palat $100 billion hapoh ka nongbah Louisiana, kaba don sha ka phang Shathie jong ka US, na ka bynta ban pynher ïa ki Starship megarocket jongka, kiba la khmih lynti bha, ha kaba la pyntrei mynta ha Texas Starbase jong katei ka kompeni.
“Ka kad liengsuiñ ha Louisiana Gulf Coast kaba pynlah ïa ka lawei kaba don bun tylli ki planet,” la pynbna ka website jong ka SpaceX.
Ia kane ka jaka thymmai yn tei ha Vermillion Parish, kumba 115 mile (185 km) shaphang sepngi na New Orleans.
“Ngi kut jingmut ban bei tyngka ym duna ïa ka $100 billion bad ban thaw palat 3,000 tylli ki kam thymmai ha Starbase, Louisiana”, la ong ka kompeni, ha kaba ka jingtei kan sdang ha u snem ban wan.
Ka SpaceX ka ong ba ka jingtei kan ïaid shabar jong ki jaka pynher liengsuiñ bad kan kynthup ïa baroh ki jingdonkam ban kyrshan ïa ki “hajar tylli ki liengsuiñ Starship ha ka shisnem,” ha kaba kaba nyngkong eh la khmih lynti ha u snem 2029.
U Starship, u dei u megarocket jong katei ka kompeni, uba dang don ha ka jingpynkhreh, ha kaba ka thmu ban pyndonkam na ka bynta ki mission sha u bnai bad sha u Mars.
“Ka Starbase Louisiana ha kaba kut kan don palat shispah tylli ki jaka pynher liengsuiñ, kaba pynlah ban pynher palat 30 tylli ki liengsuiñ Starship ha ka shisngi bad pynlong ïa ka kum ka jaka pynher liengsuiñ kaba heh tam ha ka Pyrthei!” U Musk u la thoh halor ka X, kaba u dei ruh u trai.
U Musk, u briew uba riewspah tam ha ka pyrthei, u pawnam na ka bynta ki jingkular kiba khraw bad ki por kiba don jingkyrmen bha.
Ka tnat pynroi ka ioh ka kot jong ka Louisiana ka la ong ba ka tulop ba pdeng jong ki nongtrei ha katei ka jaka kan long 192% tam na ka jingsiew ba pdeng jong katei ka thain mynta.
Ka SpaceX ka la ong ruh ba kan shim ïa ki jingpyrshang kiba kongsan ban pynneh pynsah ïa ki rud duriaw bad ban ïada ïa ki mrad ki mreng kiba don ha ka thaiñ.
Ka kompeni, ka dang pynmih mynta ïa u roket Starship jong ka, ha kawei ka jaka ha Texas, kaba don hajan ki jaka ba la iada, kaba la ioh ïa ka jingpyrshah, na ki katto katne ki kynhun kiba iada ïa ka mariang.
