Islamabad, Nailar:
Katkum ki khubor, la iathuh ba 14 ngut ki khyllung, ki la shu iap ei na ka jingkem ding ka jaka buh khyllung ha ka hospital kaba don hapoh ka nongbah Islamabad jong ka Pakistan, ha kaba, ki bor pyniaid katei ka hospital ki kynnoh ba dei ka jingsniew jong ki ‘air conditioner’ kaba la wanrah ïa katei ka jingkem ding ha katei ka sngi.
Katei ka jingpluh ding, ka la jia ha ka mala kaba lai jong ka kamra thiah ki kmie bad ki khun, kaba don ha ka Hospital paidbah ba hakhmat eh jong ka nongbah, ka Pakistan Institute of Medical Sciences (PIMS), ong ka kyrwoh jong ka ophis jong ka Islamabad district.
Katei ka kyrwoh, ka la ai ïa ka jingkhein ïa kiba iap, kiba long 14ngut bad baroh ki dei ki khyllung, ong U Shehbaz Sharif, myntri rangbah duh ka ri. La ioh ban pyllait im ïa 19ngut ki briew ba kynthup ïa ki 7ngut ki khynnah, ong u Deputy Minister kam poh iing u Talal Chaudhry.
U myntri ka tnat ka koit ka khiah, u Mustafa Kamal, u iathuh ha ki nongthoh khubor, shabar katei ka hospital, ba ki dur jong ka CCTV, ki pyni, ba ka jingshai na ka air conditioner, ka la hap, bad ka ding, ka la bthei tang hapoh shi minit.
U la ong ba la pyndonkam 26 tylli ki tiar pynlip ding ban pyrshang ban pynlip ïa ka thylliej ding hynrei ba ym don ki tiar pyntuid um ha katei ka ward.
Ki nongsakhi ki la batai ïa ki jingjia kiba jynjar bad kiba pynsngewsih, kynthup ïa ka lyer kaba jur bad ki jingkhang kiba la bthei, ka jingpynkhreh kaba suki na ki tnat pynïaid kyrkieh bad ki nongap kiba la ïathuh ba ki khanglad ïa ki briew ban mih na katei ka iing.
U Khurram Mehmood, 40 snem ka rta, u iathuh ha ki nongthoh khubor, ba u la duh noh ïa la ka khun kynthei kaba dang lai sngi, ha katei ka jingpluh ding bad ba ki nongpyllait im, ki la shim por da ki kynta ban poi.
“Ka tnga jongnga ka don ha ka ward. Ki la ialam lut ïa baroh. Ngi la shong ha surok ban ap jingiarap,” u la ong.
Ka jingkhang jong ka jaka sumar ïa ki khyllung ba dang kha ka la khang, ong ka Jaweria, kawei ka kynthei kaba la iathuh ba ka la duh ruh ïa la u khunlung.
