Tehran, Nailar:
U President ka Iran, u Masoud Pezeshkian, ha ka Sngi Balang, u la ong ba ka United States kan ym iohnong eiei ruh na ka jing pyrshang dusmon jongka ban pynsniew ïa ka ioh- ka kot jong ka Iran.
“Da ki lad ki lynti kiba ki tnat ka ioh- ka kot jong ka sorkar ki la iohi lypa, ka America kan nym lah ban ioh eiei da ka jingpyn jynjar ïa ka ioh- ka kot jong ka Iran, kumjuh hi kumba kam shym la lah ban ioh eiei ha ka thma,” la ong u Pezeshkian ha ki nongthoh khubor.
U Myntri ka tnat pla tyngka jong ka US, u Scott Bessent, ha ka Sngi Nyngkong, u la pynpaw ïa ki jingthmu jong ka US ban pyn pulom bad pynhiar ïa ka ïoh- ka kot jong ka Iran, da kaba maham tyngeh ruh ïa ki ki ri ki bym ïashim bynta ha kane ka jingbuh kyndon jong ka US bad kiba ai jingkyrshan ïa ka Iran ha ki liang ka jingpynmih bad jingkyntiew ïa ka ioh- ka kot jong ka Iran lyngba ka khaïi- pateng.
Hynrei ki nongïalam jong ka Iran, ki la kyntait ïa ka jingshah ktah ka Iran lyngba kine ki kyndon ba thymmai jong ka US, namar ba ki la dep ban shah ïa ki jingpynshitom kiba pynmong kiba la slem da ki phew snem naduh tang hadien khyndiat por jong ka jingïakhih jong ki snem 1979.
“Ka nongrim jong ngi ka long ban sngewthuh bad pynbeit ïa ki jingeh lyngba ka jingiasyllok bad ka jingiakren, hynrei ha kajuh ka por, ngin ieng skhem pyrshah ïa ki jingeh ha ka ioh- ka kot, kumba ngi la leh haduh mynta bad ngin dang iai leh,” bynrap biang u Pezeshkian.
Ka jingiakren hapdeng ka Iran bad ka America ka la sahkut noh namar ba ki ar tylli ki nongshun ki ialeh pyrshah ban synshar ïa ka duriaw Hormuz kaba donkam bha.
Ka jingïaid kali lyngba ka lynti um kaba kongsan – kaba ju kit kumba shi bynta na ka san bynta jong ka jingshalan umphniang bad ka lyer um ha ka pyrthei – ka dang sahkut haduh katta katta, kaba pynthut ïa ki iew bor ding ha ka pyrthei.
Ka Iran ka la synshar ïa ka duriaw Hormuz naduh ba la sdang ka thma ha ka 28 tarik u Rymphang, bad ka la pyrshang ban buh khajna ïa ki lieng kiba iaid lyngba katei ka duriaw.
Ka America ka kwah ba katei ka duriaw kan wanphai biang sha ka rukom iaid laitluid jong ka ha shwa ka thma, bad u president jong ka US Donald Trump u la kam ba ka Washington “ka don ka jingsynshar ba pura” halor katei ka lynti um.
Hynrei ha ka sngi thohdieng ki shipai jong ka Iran ki la pyrshah, da kaba ong ba ka Hormuz “ka don hapoh ka jingsynshar jong ngi, bad… Ym don lieng kaba lah ban iaid lyngba kane ka lynti um khlem ka jingbit jong ka Iran”.
“Lada ka America kam pdiang ïa ki kyndon jong ngi, yn nym plie ïa ka duriaw Hormuz ha kano kano ka jinglong.”
