America, Nailar:
Uwei u heh sorkar jong ka US, ha ka Sngi Palei haba iakren bad ki nongthoh khubor, u la ong ba u Treasury Secretary jong ka US, u Scott Bessent, un pynkhlaiñ ïa ki jingpyrshang ban pyntroiñ ïa ka Iran ha ka liang ka ioh- ka kot, namar ba un pdiang ïa ki paralok jong ka G20.
Ki Myntri pla pisa bad ki nongsynshar jong ki bank pdeng na ka kynhun jong ki 20 tylli ki ri kiba heh, kin ioh ban iakynduh lang hapohAsheville, ha ki bynta lum jong ka Asheville, North Carolina, ha ka Sngi Nyngkong bad Sngi Ba-ar ban wan.
Ka jingiakren jong ki, ka dei kaba nyngkong na ki katto katne ki jingialang ba kongsan jong ki Myntri mynta u snem, kaba la plie lad ïa ka jingialang jong ki nongialam jong ka G20, kaba U President Donald Trump un pynlong ha u bnai Nohprah hapoh ka nongbah Florida.
Ha Asheville, ki ophisar jong ka US kin pynksan ïa ki dkhot jong ka G20 ïa ka jingdonkam ban kohnguh ïa ki jingpynjari kyndon jong ka US pyrshah ïa ka Iran, namar ba ka thmu ruh ban nang pynjur ïa ka jingpynbor ïa ka Iran katba ka thma ha Middle East ka dang iai bteng, ong uwei u heh jong ka tnat pla tyngka ha ki nongthoh khubor ha katei ka sngi.
U heh sorkar ba la ai dak ïa u Bessent un kyrpad beit beit sha ki paralok ha ki jingialang ba arliang mamla. Hynrei ki la sangeh noh ban ïasam mano ba u la buh por ban ïakren bad hato ki kynthup ïa ka China.
Ka G20 ka kynthup ïa 19 tylli ki ri ryngkat bad ka synjuk Europe bad ka synjuk Africa. La seng ïa ka hadien ka jingeh ha ka liang ka pisa tyngka ha Asia ha u snem 1997-1998 ban kyntiew ïa ka ioh ka kot bad ka jinglong jingman ha ka pyrthei.
Hynrei ka South Africa ka la shah kyntait noh na ka G20 hapoh ka jingsynshar jong ka US mynta u snem, katba ka America ka la khot ïa ka Poland ban shong ha ka miej.
Ha ka taiew ban wan, ki heh jong ka US kin pynbor ruh ban weng ïa ki jingeh kum ka jingbun palat ka bor karkhana, ban kyntiew ïa ka jingroi ka ïoh ka kot kaba khlaiñ bad ban tei ïa ki lad pynpoi mar kiba lah ban shaniah na ka bynta ki marpoh khyndew kiba kongsan kum ka bor ding.
Watla ki jingiakren jong ka G20 ki la nang pyniar ban ktah ïa ki mat kum ka jingkylla ka suinbneng bad ka koit ka khiah ha ka pyrthei katba nang mih ki sngi, ki nongpeit bniah ki khmih lynti ba ka America kan kyrshan ïa ka rukom “phaidien sha ki jingsdang” mynta u snem.
Kane ka mut ka jingpynleit jingmut thymmai halor ka ram, ka khaii pateng, ka jingshong shngain ha ka liang ka pisa tyngka bad ka jingpyniaid ïa ki bank, u Josh Lipsky, chairman jong ka International Economics ha ka Atlantic Council tank, u la iathuh ha ka AFP.
Hynrei kane ka jingialang kaban sa wan, ka wan ha ka por ba ki nongialam pyrthei jong ka US, ki iakynduh ïa ka jingtynjuh.
Ki jingsngewkhia halor ka jingkiew jong ka ram jong ka US ki nang kiew, katba ki jingpynkiew dor ba heh jong u Trump kiba thmu ïa ki nongïalehkai — bad ki paralok ba la slem kum ka Canada — ki la pynjynjar ïa ki jingïadei.
