Kyiv, Nailar:
Ki bor pyniaid ka Ukraine, ha ka Sngi Palei ki la phah kynriah lut noh ïa baroh ki paid nongshong shnong na ka nongbah Kherson kaba marjan bad ki thaiñ ba la ioh synshar da ki shipai ka Russia bad kane ka long hadien ba ka Russia ka la sdang ban pynjur biang ïa ka jignleit hiar thma sha Ukraine bad khamtam ïa ki shlem treikam ka Ukraine naduh ki shlem pynmih bor ding bad kiwei kiwei de ki jaka treikam ba kongsan ban pynbiang ïa ki jingdonkam jong u paidbah.
“Nga kren biang sa shisien sha ki nongshong shnong jong ka Kherson, khamtam sha ki longïing kiba don khynnah bad ki tymmen: lada phi don ka lad… sngewbha mih noh,” la thoh u Lat ka thaiñ, U Oleksandr Prokudin, ha ka Telegram.
U Prokudin u la ong ba ka don ka “jinglong jingman kaba eh haduh katta katta ha ka liang ka jingïada” ha Kherson, kaba don kumba 280,000 ngut ki nongshong shnong shwa ban sdang ka jingwan hiar thma jong ka Russia ha u bnai u Rymphang ha u snem 2022.
“U nongshun u nang pynjur ïa ki jinghiar thma jong u man la ka sngi ïa ki jingtei ba kongsan jong ka thaiñ,” u la bynrap.
“Hynnin ka miet, ki shipai Russia ki la thombor biang ïa ka jaka pynkhluit district jong ka Kherson da ki bom glide… katei ka jaka ka la mad ïa ka jingjulor kaba jur bha.”
“Ka Kherson ka lah ban shem ïa lade khlem bording ne jingpynkhluit ym da ki kynta ne sngi hynrei da ka por kaba jrong.”
“Mynta, ym don lad ban pynduh ïa kine ki jait drone ne ki bom na suin ha kano kano ka thain jong ka ri jong ngi.”
Ka Russia bad ka Ukraine la katto katne bnai ki la pynjur ïa ki jinghiar thma jong ki kiba jngai, da kaba nang pynjur ïa ki jingtei jong ki riew paidbah kum ki jaka buh marbam bad ki jaka buh umphniang bad ka kad liengsuiñ.
Ka jingshah pyniap jong ki riew paidbah ka nang kiew namar kane.
Ha ka por lyiur ba la dep, ki shipai Russia ki la ther bunsien ïa ki jaka pynmih bor ding jong ka Ukraine, ha kaba la pynngam ïa ki million ngut ki briew ha ka jingkhriat bad jingdum.
Ka Kherson ka la don hapoh ka jingsynshar ka Russia naduh u Lber haduh u Naiwieng 2022. Ki shipai Russia mynta ki don sha shiliang jong ka wah Dnipro kaba don ha khappud bad ka bad ki ju siat bom man ka por ïa kane ka nongbah.
