America, Nailar:
U President jong ka America, U Donald Trump ha ka Sngi Palei, u la ai dak ba ka sorkar jong u, ka lah ban pynkhreh ïa ki jingpynjari kyndon, kiba la thmu pyrshah ïa ki bank jong ka China, halor ka jingïadei kam jongki bad ka Iran, kum ka jingpyrshang ba jur jong ka US ban ioh ban pyniakhlad ïa ka Iran na kiwei pat ki paralok iadie- iathied jongka namar ka jingbym kohnguh ne pdiang ïa ki jingtyrwa jong ka US.
U Treasury Secretary, U Scott Bessent, ha kane ka taiew, u la pynbna ba ka America, ka dang pynjur ïa ka jingïakhih jongka, ban pynliem ïa ka sorkar Iran, lyngba ki jingpynjari kyndon ïa ka khaïi- pateng jong katei ka ri ban pyntroiñ ïa ka, ha ka liang ka ioh- ka kot bad da kiba bun ki lad ki lynti katba kaba ki US ka hap ban leh.
Kane ka kynthup ïa ka jingma kaba la pynheh bha ïa ki jingpynjari kiba arsien ïa ki ri kiba dang ïai bteng ban ïatreilang bad ka Iran.
Ka China ka dei ka paralok khaii kaba heh tam jong ka Tehran, khamtam haba iadei bad ka umphniang. Ki bank China ki dang iai bteng ban pyniaid ïa ki jingsiew kiba iadei bad kita bad kiwei kiwei ki rukom khaii pateng hapdeng ki ri.
Haba la kylli da ki nongthoh khubor ha kawei ka jingïalang ha ka Oval Office la un pynshitom ne em ïa ki bank China halor kum kine ki jingpynïaid, u Trump u la jubab da la ka jong ka jingkylli.
Ka tnat pla tyngka jong ka US haduh mynta kam pat pynmih kano kano ka jingpynjari pyrshah ïa ki bank heh jong ka China, wat la ka la pynjari ïa ki katto katne ki kompeni ha mainland China bad ha Hong Kong kaba ka kynnoh ba ki iarap ïa ka sorkar Iran bad ki shipai.
Ka China ka la pyrshah ïa ki jingpynjari kyndon ba ar jong ka US kiba ïadei bad ka Iran kum ki jingpynjari kiba be-aiñ.
