Kathmandu, Nailar:
Katkum ki khubor, la ong ba wat hapdeng ka jingpyrshang jong ki tnat iarap ban ioh pyllait im ïa ki lanot kiba shah ktah bad ngat ha ka jingshlei um kaba la jia ha ka thaiñ khappud jong ka China bad Nepal, 2 ngut ki nonglute ki la shah kem noh hadien ba ki la pyrshang ban lute ïa ki soh shkor ksiar na ka met jong kawei ka briew kaba la shah rong noh shapoh wah ha ka por ba la jia ka jingshlei um ha ka wah Narayani. Kane ka jingshah kem jong kitei ki 2 ngut, ka la jia hadien ba kawei ka video ka la saphriang paidbah, ha kaba, la iohi ïa kitei ki arngut kiba dang ialeh ban tan ïa kawei ka briew kaba lah iap hapdeng ka jingshlei um bad kiba pyrshang ban tan ïa ka na u shñiuh khlieh jongka bad ki la pajut ïa ki ksiar kiba doh ha ki shkor jong ka.
Hadien ba la iohi ïa katei ka video, ki pulit ka Nepal ki la pyllait biang ïa katei ka video kaba 41 sekhon, da kaba ong ba kitei ki arngut ki la shah kem namar ka jingleh be-aiñ jongki, da kaba lute ïa ki ksiar na shkor jong katei ka briew kaba la shah rong um bad iap ha katei ka jingshlei um.
Ha katei ka video, la lah ban iohi ïa kitei ki arngut, kiba dang tan ïa ka met iap jong katei ka kynthei, na um, da kaba pyndonkam ïa ki dieng bad tan ruh na u shñiuh jongka bad nangta ki la pajut ïa ki ksiar kiba ka deng na ki shkor jongka, ha ka por ba katto katne ngut ki briew, ki ieng peit sawdong jongki. Hadien kane, ki pulit ka Chitwan ki la ïathuh ba ha ka jingtohkit jongki, la lap ba kane ka jingjia ka ïadei bad kawei ka met ïap kaba la shah rong noh sha ka wah Narayani ha ka jingshlei um kaba jur.
Da kaba pynshong nongrim lyngba jong kane ka video, ki pulit ki la pynithuh ïa kitei ki arngut ki nonglute kum u Madan Gurung 25 snem ka rta bad u Umesh Chaudhary 38 snem ka rta bad la ioh kem noh ïa ki najan ka jaka ieng bos kaba don hapoh Bharatpur.
Shuh shuh ruh ki pulit ki la maham ïa kino- kino ruh ki nongthmu ba kim bit ban leh iakum kine ki jait kam lute ne ban shim kabu ïa kiba lui-lui ha kum kitei ki por bad ki jingjia kiba jynjar.
