Jerusalem, Nailar:
Ki heh ka koit- ka khiah na Gaza ki la iathuh ba ka jingliet hiar thma biang jong ki liengsuiñ ka Israel ha ka Sngi U Blei, ka la shim ïa ka jingim jong arngut ki nong Palestine, ba kynthup ïa uwei u khynnah, uba dang lai snem ka rta, ha ka phang pdeng jong kan ongbah Gaza.
Ki nongsumar jong ka Gaza, ki iathuh ba ka jingther bom ki liengsuiñ Israel hajan kawei ka tyndur shet jingbam ha Deir Al-Balah, ka la shim ïa ka jingim jong uwei u briew uba la ithuh kum u Hussam Nusair bad kumjuh ruh uwei pat u khynnah rit uba dang lai snem ka rta, uba la tip kyrteng kum u Tayyem Hamdan bad kane ka jingleit hiar thma jong ka Israel ka la pyn mynsaw ruh sa ïa ki katto- katne ngut kiwei pat kiba don ha katei ka jaka.
Ki shipai Israel ki la pyntip ba katei ka jingleit hiar thma jongki ha katei ka sngi, ka long pyrshah ïa uwei u lehnoh Hamas hynrei kim shym la ai jingtip ne pynshai bniah halor kane.
Ka jingsangeh thma kaba la kyrshan da ka U.S. ha u bnai Risaw jong u snem 2025, ka la pynsangeh ïa ki jingïaleh kiba jur ha ka jaka ba la shah pynpra, hynrei kam shym la lah ban pynkut noh ïa ki jinghiar thma jong ki shipai Israel, kiba ka la ong ba ki thmu ban pynthut ïa ki jinghiar thma jong ka Hamas bad kiwei kiwei ki lehnoh Gaza.
Ka Hamas, ka kynnoh ïa ka Israel, ba ka la pynkheiñ ïa ka jingsangeh ïasiat bad pynthut ïa ki jingpyrshang ban pyntreikam ïa ka plan kaba kham iar jong u President U.S., U Donald Trump, ban pynkut noh ïa ka jingïakynad ha Gaza, kaba kynthup ruh ïa ka jingweng noh jong ki Israel bad ka jingpynduh tiar ïaleh jong ka Hamas.
Palat 1,300 ngut ki nong Palestine ki la shah pyniap ha Gaza ?naduh ba ka jingsangeh iasiat ka la sdang treikam ha u bnai Risaw ba ladep, ong ki heh ka koit ka khiah jong ka Gaza, katba ki shipai Israel ki ong ba saw ngut ki shipai Israel ki la shah pyniap.
