Venezuela, Nailar:
Katkum ki khubor, la ong ba utei u nongialam jong ka Venezuela, uba la shah weng shuki, u Nicolas Maduro, ha ka Sngi U Blei, u la paw pyrthei biang ha ki rynsan ‘social media’ da kaba pynbna ba u dang khlaiñ bad “ieng skhem” kumba ju long, ha kaba, u la pyni ruh ïa ki dur jong u na patok jong ka nongbah New York, kaba u la shah set naduh ba la kem ïa u da ki shipai US.
U Maduro bad ka kurim jong u, ka Cilia Flores, ki la shah kem ha Caracas, ha ka por ba ki shipai jong ka US, ki pynlong ïa ka jingleit khynra ba kyndit ha u bnai Kyllalyngkot jong une hi u snem 2026. La set ïa ki ha ka phatok ha Brooklyn, New York, halor ka jingkynnoh ba ki don kti ha ki kam khaïi droks bad ki don ruh ïa shibun ki tiar siat, kaba kitei ki shi kurim ki la kyntait bad kim shym la kam trai halor kitei ki jingkynnoh.
“Nga phah ïa kine ki dur kum ka jingai sngewbha kaba rit sha baroh ki khun ki kti jong nga, sha ki khynnah shynrang bad kynthei, bad sha baroh ki briew kiba bha kiba ieid ïa ngi,” u la thoh hapoh ka rynsan ‘social media’ jong u ha katei ka sngi.
“Nga kwah ba phin tip ba ngi ieng skhem, da ka dohnud kaba dap da ka jingieid jong phi,” u la bynrap.
Ha kitei ki ar tylli ki dur, u Maduro, u phong ïa ka tracksuit kaba rong saw bad u shna ïa ki dak jingsuk, da ki kti jongu. U paw ba u la duh shibun ka jingkhia naduh ba la kem ïa u.
Watla ki dur ki la mih ha ka Sngi U Blei, hynrei ki jingtip jong ki camera ki pyni ba la shim ïa ki ha ka 25 tarik u Jylliew, shisngi hadien ba ki jingkhynñiuh jumai ba la pynïap arsien ki la ïap palat 6,500 ngut ki briew bad wanrah ïa ka jingpynjot kaba jur ha ka thaiñ shatei lam mihngi jong ka Venezuela.
“Ngin dang khlain, jemnud bad sngewskhem: U Blei u don ryngkat bad ngi. U Blei un pynbiang. Ka Venezuela kan sa khie im biang,” u la pynkut.
Ia kane ka khubor la pynmih ar sngi hadien ba u nongmihkhmat jong u, u President ba shipor u Delcy Rodriguez, u la pynbna ïa ka jingiateh umphniang kaba “long histori” kaba ailad ïa ka America ban pyniaid ïa ki jaka tih umphniang ha Venezuela.
Ka Rodriguez ka synshar hapoh ka jingpynbor kaba jur bha na Washington bad ka ong ba ka la “jied ïa ka lynti jong ka jingiasyllok” bad ka America namar ba ka kwah ba ka Venezuela kan long ka “ka bor pynmih bor ding.”
U Maduro um don lad ban ïoh ïa ki kot khubor lane ïa ka internet ha phatok, hynrei la shah ïa u ban ïakren lyngba ka telephone bad kiba haïing hasem bad ki nongïasaid aiñ jong u kumba 300 minit ha ka shibnai, ha kaba ym lah ban ïakren tang 15 minit ha kawei ka jingkhot, ong ka tyllong khubor ba ïajan bad une u nongïalam barim.
U khun jong u, u Nicolas Maduro Guerra, u iathuh ba u don ha ka met kaba bha bad u pynlut ïa ka por jong u, ha kaba pule ïa ka Baibl.
Ka jingbishar ïa u Maduro bad ka tnga jongu ha America, kan sdang naduh ka 1 tarik u Jylliew, 2027, ong ka ïingbishar jong ka sorkar pdeng ha New York, kaba la pynbna ha kaba kut jong u Naitung.
