Washington, Nailur:
Utei u ophisar ba ha khlieh duh jong ka tnat shipai jong ka US, u ong ba kam don kano- kano ka jingthmu ban phah ïa ki shipai sha ki jaka thep vote, ha ka ilekshon shiteng samoi jong u bnai Nohprah, da kaba pynbeit ïa ka jingsngewkhia jong ki Democrats, ba ka sorkar Trump, ka lah ban pyndonkam ïa ki shipai, ban tuklar ïa ka jingthep vote.
U Gen. Dan Caine, u Chairman jong ka Joint Chiefs of Staff, ula pynpaw ïa kane, ha ka shithi sha ka Michigan Democratic Sen. Elissa Slotkin, kaba dang shen, ka la kyrpad ïa u Caine bad u Secretary jong ka tnat ïada ri, u Pete Hegseth, ba kin pynthikna ba kin nym phah shipai sha ki jaka thep vote.
“Ka Joint Force kam don kano kano ka jingthmu ban phah ïa ki shipai jong ka sorkar pdeng lane ki dkhot jong ka sorkar pdeng jong ka National Guard sha ki jaka thep vote ha ka por ilekshon 2026,” ong u Caine ha ka shithi sha u Slotkin, kaba la ïoh ha ka sngi Nyngkong da ka The Associated Press. “Kumjuh ruh ka Joint Force kam don jingthmu ban pyndonkam ïa kum kine ki briew ban kurup ïa ki kot thep vote, ki mashin thep vote, lane kiwei kiwei ki tiar kiba iadei bad ka elekshon.”
U Caine, uba ai jingmut ïa u Hegseth bad ïa u President Donald Trump ha ki kam shipai, u la thoh ruh da kaba ong, “Ngam shym la ïoh ne khmih lynti ban ïoh ïa kano kano ka hukum kaba be-aiñ ha kaba ïadei bad ka bynta jong ka kynhun shipai ba ïatreilang ha ka ilekshon shiteng samoi jong u bnai Naiwieng 2026 u ban sa wan.”
Ka jingsngewkhia hapdeng ki Democrats ba ka sorkar Trump ka lah ban pyrshang ban tuklar ha ka ilekshon shiteng samoi ka la nang jur, khamtam hadien ba u President u la phah ïa ki briew jong ka sorkar pdeng ha ki jylla ba la ïalam da ki Democrats halor ka jingpyrshah jong ki nongïalam shnong.
