Washington, Nailur:
U President ka United States, u Donald Trump, ha kane ka kynti, u la kyntu ïa ka Apple ba kan pynkylla noh ïa ka kyrteng jong ka ‘Lake Ontario’ sha ka ‘Lake America’ hapoh ka dur map jong ka app jongka, la iathuh u heh katei ka kompeni ha ka Sngi Nyngkong bad kane ka long ruh tang hadien katto- katne sngi ba u Trump u la pynkylla kyrteng ïa katei ka Nan hapoh ka dur map jong ka US.
U Secretary kam pohïing u Doug Burgum u la ïathuh ha ka prokram “Mornings with Maria” jong ka Fox News ba u Trump u la ïakynduh markhmat bad ki heh jong ka kompeni Apple. U la ong ba u ngeit skhem ba ïa ka kyrteng “Lake America” yn lah ban iohi ha ka rynsan jongka, shen!
Watla katta, la ong ba na ka liang jong ka kompeni Apple, kam shym la kren eiei mardor halor kane. Tang ka kyrteng jong ka pung Ontario ka la paw ha ka rynsan jong ka haduh ka janmiet jong ka sngi Nyngkong, watla ka jingthoh ka la paw bha ha jrong jong u pud um jong ka Canada.
Tang ha ka sngi kut taiew, ka Google Maps kaba ïakhun pyrshah, ka la pynmih ïa ka kyrteng thymmai jong ka “Lake America” na ka bynta ki nongpyndonkam jong ka US, kiba peit ïa ka met um kaba shong hapdeng ka jylla New York bad ka jylla Ontario jong ka Canada. Ka kompeni ka la kdew ïa ka hukum ba dang shen jong u Trump, bad ïa ka rukom treikam jong ka kaba la buh lypa ban pyndonkam ïa ki kyrteng ba la ai da ka Geographical Names Information System jong ka US, kaba la tip ruh kum ka GNIS.
U Trump u la pynbna ïa ka kyrteng thymmai “Lake America” ha ka taiew ba ladep – kaba long kawei na ki jingpynkhihwin ba khatduh eh ha ka por jong ka thma khaii pateng jong u bad ka Canada kaba mynta ka la pynkiew dor ïa ki dor ha baroh arliang jong u pud u sam. Ka hukum jong u ha ka sngi palei ka la bthah ïa ka tnat kam pohïing ban pynthymmai ïa ka kyrteng jong ka pung ha ka jingshakri ai kyrteng jaka jong ka US.
U president um lah ban pynbor ïa ka Canada ban bud ïa ka, watla katta. Bad ki para marjan jong ka America kiba shaphang shathie ki la pan stet ïa ka jingmut. U nongialam jong ka Seneca Nation ha ka thain shatei lam mihngi jong ka New York u la ong ruh ba katei ka jingleh ka pynkhein ïa ka jingiateh kaba la rim palat 225 snem bad ka pyni ïa ka jingbym burom kaba paw pyrthei ïa ki trai ri trai muluk kiba la ai kyrteng ïa ka pung Ontario ha ka por ba nyngkong.
Kane kam dei ka sien kaba nyngkong ba u Trump u la pynkylla kyrteng ïa ki um kiba ïaid shabar ki pud jong ka U.S. Ha u snem ba la dep, u Trump u la hukum ba ïa ka Gulf of Mexico yn pynkylla kyrteng noh sha ka Gulf of America – bad baroh ar tylli ki Apple bad ka Google hadien ki la pynthymmai ïa kane ka kyrteng ha ki map jong ki ha U.S.
