Bankok, Nailur:
Ha kane ka khubor, la ong ba uwei u nong-ap jong ka jaka dih hapoh ka nongbah Bangkok jong ka ri Thailand, u la paw paidbah ha ka video kaba la saphriang katba u dang khi lyndum ïa kawei ka nongleit dih- leit bam sha katei ka jaka hadien ba kam shym la lah ban siew shuh ïa ka bai dih- bai bam jongka.
Kane ka la jia ha ka 25 tarik u Nailar, ha kaba la iathuh, ba katei ka samla 18 snem ka la leit rung sha katei ka jaka dih kaba paw nam hapoh Pinklao, da kaba pyndonkam ruh da ka ID ba shu thok. Hadien ba ka la leit rung sha katei ka jaka, la ong ba ka la pan ki jingdih- jingbam bad kaba la dih- bam lut baroh haduh ba kan da sngew hun ka mynsiem bad ka bai bam jongka, ka la poi shaduh ka 60,000 tyngka ha ka pisa Thailand.
Hadien ba ki nongtrei jong katei ka jaka dih, ki la sngewthuh ba katei ka samla kam don jingmut ban siew hynrei ka la pyrshang wad lad pynban ba kan ioh phet tuh bad mih noh na katei ka jaka, ki la leit ban kylli ïa ka bad kaba bakla hangne ka long ba, ha ka jaka ba kin phone bad aiti sha ki bor ka aiñ bad ki pulit haba iadei bad kane ka jingleh be-aiñ jong katei ka samla, hynrei ki la shim ïa ka rai ha ka kti jongki ban ai jingsneng ïa katei ka samla da kaba khi lyndum ïa ka khlieh jongka baroh kawei.
La ong ba kitei ki nongtrei ki la shim noh da u shñiuh jongka, ban ioh ban die pat ïa u shñiuh jongka bad nalor kata, la iohsngew ruh ha katei ka video ba u nongring jong katei ka video, u la ong ïa katei ka samla, ba kam pat biang tang katne, hynrei lada ka bai die ïa utei u shñiuh kam pat mih, kin dang hap ban shim sa da kiwei pat ki lad ki lynti ban pyniabiang bad ka bai bam- bai dih jongka baroh.
