New York, Nailur:
Katkum ki khubor, la iathuh ba kawei ka briew ka la talaiñ da ka tari ha ka jaka ba bun ki riew shangkai pyrthei hapoh Tines Square jong ka nongbah New York ha ka Sngi Nyngkong, ha kaba ka la ioh dung iap ïa uwei u briew bad ioh pynmynsaw pat ïa uwei ha katei ka jingjia ha katei ka sngi.
U heh katei ka nongbah, u Zohran Mamdani, u la pynbna ïa ka jingiap jong utei u nongshah thombor ha katei ka jingjia bad la iathuh ruh ba ïa uwei uba 2 pat uba shah dung tari, la pynkit mar- mar sha jakasumar bad u la lait na ki jingma kiba ap ïa ka jingim jong u.
Ki khubor ki iathuh ba ïa katei ka briew, la rah noh sha hospital hadien ba ka la mynsaw na katei ka jingjia. Hynrei ki pulit ka nongbah New York, kim shym la ñiew ïa kane ka kam, kum ka kam thombor jong ki lehnoh lane kaba ap jingma ïa katei ka nongbah na ki kam thombor ki lehnoh. Katto- katne ki nongsakhi ha katei ka jingjia, ki iathuh ba katei ka briew ha katei ka sngi, ka bat ïa 2 tylli ki tari ha ka kti ka diang bad kti ka mon jongka bad ka la shah beh kthong ha ki pulit hashwa ba kan leit tur sha ka jaka ba don ki heh pulit.
La ong ba ki pulit ki la ioh siat ïa ka haduh 2 kuli.
Watla katta, ym pat lah ban tip ïa ka daw jong katei ka kam thombor jongka bad ki pulit kin dang hap ban bteng haba iadei bad katei ka jingjia bad kitei ki pulit kiba siat ïa ka ruh kin shah tohkit halor kaba iadei bad ka aiñ pyndonkam suloi ba la buh.
