Washington, Nailur:
Ki shipai jong ka United States, ki la ong ba ki la pyndep ïa ka jinghiar thma pyrshah ïa ki ktem shipai jong ka Iran, kiba kynthup ïa ki jaka iada suiñ, ki jaka buh bom bad kiwei kiwei de ki shlem treikam jong ki shipai ka Iran. Hynrei, u nongaiktien jong ka tnat kam bar ri jong ka Iran, u la ong ba ki jinghiar thma jong ki nong America ki thmu ruh ïa ka jingrakhe ïathoh shongkurim ha Sirik, kaba la pynlong ïa palat 50 ngut ki briew ban mynsaw bad duh ei ïa ka jingim.
Haba ïasam ïa ki jingtip ba bniah ha ka jingthoh hapoh ka rynsan X, ka CENTCOM ka la ong, “Ki shipai jong ka US ki la thombor ïa ki jaka ba la thmu ban ïada ïa ka suiñbneng, ki jaka radar, ki marpoh khyndew bad ki jaka treikam ha duriaw, ki jaka buh mawshun, bad ki jaka ïadei.”
Ka la ong ba kitei ki jingiakhih ki bud hadien ki “jingpyrshang thombor” ba dang shen da ka IRGC pyrshah ïa ki jhad khaii ha ka duriaw bah Hormuz bad pyrshah ïa ki dkhot shipai jong ka America.
Ka jingthoh jong ka CENTCOM ka la kdew shuh shuh ba palat 50,000 ngut ki dkhot shipai jong ka US ki dang treikam mynta ha kylleng ka Asia Sepngi, bad ki “dang long kiba husiar, kiba pyniap briew, bad kiba la pynkhreh ban bteng ban pyndep ïa ki kam ba la bthah da u Rangbah Shipai.”
Ka la sam ruh ïa ka video kaba kynthup ïa ki dur jong ki katto- katne ki jaka ba la shah thombor ha ki shipai America.
