Washington, Nailur:
U President ka United States, u Donald Trump, ha kane ka kynti u la ai jingmut ban pynkylla kyrteng noh ïa ka duriaw ‘Strait of Hormuz’ sha ka duriaw ‘Trump Strait’, wat hapdeng ki kynrum- kynram bad ki jingiaknieh kam trai ïa katei ka bynta jong ka duriaw ha ka dur map jong ka pyrthei.
“Mynta ba ngi la ioh bat ïa ka hapoh ka jingsynshar jong ka U.S.A., hato ngi dei ban pynkylla ïa ka kyrteng jong ka wah Hormuz sha ka duriaw TRUMP??? Kum ka America hi, kan long kaba ‘kham rhem’ ban ïa kaba mynshuwa!” la ong u Trump hapoh ka rynsan Truth Social jong u.
Kane ka long ka jingpynkylla kyrteng kaba hadien duh kaba la wanrah da u Trump bad ka long ruh tang shi taiew hadien ba u la hukum ïa ka Lake Ontario ban pynkylla kyrteng noh kum ka “Lake America” hapdeng ka thma khaii pateng bad ka Canada.
U Trump u la pynkylla kyrteng ruh ïa ka Gulf of Mexico sha ka “Gulf of America” ha ka sngi ba nyngkong ka jingwanphai biang jong u sha ka kam, kum u President ha y Kyllalyngkot jong u snem 2025.
Bun na ki jingpynkylla kyrteng kiba la dep, ha kaba sdang ki long tang kum ki jingkren sngewtynnad ne jingkren thamula da u President jong ka US uba la 80 snem ka rta, hynrei la ong ba kitei ki jingkren thamula jong u, hadien ki urlong bad kylla long shisha noh da ka kam kumba u la dep ban kren da ka ktien.
U Trump ha kine ki taiew ba la dep u la pynbor bunsien ïa ka jingbyrngem ban dawa ïa ka jingsynshar halor ka duriaw Hormuz, wat ban buh ïa ka map kaba pyni ïa ka lynti um kum ka ” jaka thymmai jong ka US.”
Hynrei ka Iran ka la khang da kaba tyngeh ïa katei ka bynta jong ka duriaw, kaba long shi bynta- na ka san bynta jong ka lynti shalan umphniang ha ka pyrthei bad kane ka long ruh kum ka jingpynshitom beiñ ïa ka thma kaba u Trump u la sdang ryngkat bad ka Israel ha kaba kut jong u bnai Thowbah.
Ka dor jong ka umphniang ka kiew biang hadien ba ki shipai jong ka US ki la sdang ïa ki jinghiar thma ba thymmai hajan ka Strait of Hormuz ha ka Sngi Ba-ar kum ka jingkynthoh ïa kaei kaba u Trump u la ong ba ki dei ki jingpyrshang tih mawshun ba thymmai jong ka Iran.
