Shillong, Nailur 03
Ka kynun ïalehkai ka Jylla ka la bteng biang ïa ka jingjop kaba ar ha ka Group-C jong ka Junior Boys National Football Championship 2026-27 (Tier 1) na ka bynta ka Dr. BC Roy Trophy, hadien ba ka la pynliem noh ïa ka Maharashtra ha ka sngi Palei ha Bengaluru.
U Adriel B Nongbet (Player of the match) u la thep ar kol ha ka minit kaba 18′ & 47′ bad ïa kawei pat la pynbud da u Habankhlur Lyngdoh Mawnai (52′) na ka bynta ban pynlong ïa ka Megha-laya ban kamai 6 poiñ.
Kumba ka paw ha kane ka jingïakhun, u coach ka Jylla u Playerson Jitem Syiemlieh um shym la bujli rangïalehkai, hynrei ki dei beit kijuh kumba ki la ïalehkai ha ka jingïakhun kaba nyngkong bad kaba la jop da 2-1 kol ïa ka Tamil Nadu ha ka sngi Ba-ar.
Ha kane ka jingïakhun ka Meghalaya ka la ïoh ban pynkhih jar nyngkong eh lyngba u Adriel hadien ba u rangïalehkai ‘dien ka Maharashtra u Krishna Acharya um shym la lah ban khanglad ïa utei u rangïalehkai shakhmat ka Meghalaya.
U Adriel u la pynbud biang sa shi kol tang hadien ar minit ba la bteng ïa ka kylla miet. Kane ka la wan ha kaba nyngkong u Habankhlur u la ïoh ban shut ïa ka bol, ha kaba u rangapkol ka Maharashtra u la pyrshang ban kylla ïa ka bol, hynrei ka la poi pynban sha u Adriel, um bym shym la pynlehnohei ïa kane ka kabu ksiar.
Hadien san minit, u Habankhlur u la ïoh ban thep kol na ka bynta ban pynlong ïa ka Meghalaya ban tam da 3-0 kol ïa ka liang pyrshah. Kane ka la wan hadien ba u Aibannangkhraw Kharumnuid, u la ïoh ban shut najngai na ka bynta ban pynbuh ïa u Habankhlur, u bym shym pynlehnohei ïa kane ka kabu ksiar bad u rangapkol ka Maharashtra u Garv Singh um shym la lah ban pyllait na ka jingshah thep bad ha kaba kut ka la mad ïa ka jingshah rem.
Ka Meghalaya kan pynkhreh biang ïa ka jingïalehkai kaba khatduh pyrshah ïa ka Mizoram ha ka por 8:15 mynstep. Hadien ba ka la jop ïa ka Tamil Nadu da 7-0 kol ha kawei pat ka jingïalehkai ha ka sngi Palei, ka Mizoram ka la kamai 6 poiñ. Te kumta ka la ïaryngkat mar katjuh bad ka Meghalaya, hynrei ka Mizoram ka la tam lyngba ka jingïapher ha ka jingthep kol (+9 to +4). Te kumta ka Meghalaya kan donkam ban jop ha katei ka jingïakhun kaba khatduh khnang ba kan lah ban pynthikan ban jam sha ka semi final namar tang kawei ka kynhun ka ban wan ha ka kyrdan hakhlieh ka ban ïoh rung sha ka semi final.
Ki rangïalehkai ka Meghalaya kiba la ïoh mih madan ki long u Alvin Kharbani (GK), Shanbor-lang Khongjee (sub Da-mang Kynsai Marbaniang 87′), Franky Kharkrang, Samuel Malieh (sub Ha-bankara Blah 87′), Wal-lambok Thongni, Pyrkhat-lang Marbaniang, Andrew Kharsati (sub Mangpaka Nongkynrih 82′), Aiban-nangkhraw Kharumnuid, Adriel B Nongbet (sub Sei-bok Lyngdoh 73′), Aiborlang Mulieh (sub Skhemlang Marthong 73’) & Habankhlur Lyngdoh Mawnai.
