Kyiv, Nailur:
U President ka Ukraine, u Volodymyr Zelensky, ha ka Sngi Balang, u la maham tyngeh ïa ka Russia bad ong ba ka jingsuk bad jingshngaiñ jong ki lynti suiñ ka Russia, mynta ka la kut, namar ka jingiai bteng jong ka Russia ïa ka jingpyni bor bad jingleh donbor pyrshah ïa ka Ukraine mynta la bun snem.
Namar la ong ba baroh arliang ri hi, ki la pynjur ïa ka jingiakhun bad jingther bom markylliang ha kine ki bnai ba la dep bad ki jingpyrshang jong ki nongïalam ba la ïalam da ka America ki dang sahkut la 4 snem mynta naduh ba ka Russia ka la leit hiar thma ïa ka Ukraine.
“Mynta ka sngi, ngi kwah ban maham ïa kawei pa kawei ka kompeni liengsuiñ kaba pyndonkam ïa ki lynti suiñ ka Russia, ïa kawei pa kawei ka kompeni insurance bad ïa baroh kiba dang pyndonkam ïa ki kad liengsuiñ ba kongsan jong ka Russia, ba kam don jingshngaiñ shuh ïa ki bynta suiñ jong ka Russia”, la ong u Zelensky ha ka jingkren jong u kaba man ka miet.
“Ka Ukraine kam byrngem ïa ki liengsuin paidbah kumta – wat tang kawei ka liengsuin paidbah. Kan don tang ki drone ha suinbneng jong ka Russia ha ka jingthew kaba hap ban shim khia,” u la ong.
Ka jingleit jingwan jong ki liengsuiñ ha ki kad liengsuiñ jong ka Russia, ka la shah pynthut bunsien namar ka jingwan jong ki drone jong ka Ukraine, ha kaba ka jingdon jong ki, ka la nang kiew ha kine ki bnai ba ladep.
“Ki bneng kiba la shah ktah ha ki drone kim dei ki jaka na ka bynta ki liengsuiñ paidbah”, la ong u Zelensky. “Ka bneng halor ka Russia mynta ka dei na ka bynta ki drone… katba ka thma ka dang bteng.” U Putin u la jubab da kaba khot ïa ki jingkren jong u Zelensky “ka jingpynbna ïa ka jingleh donbor jong ka jylla”.
“Ki kyrpad ïa ngi ban sdang biang ïa ka jingiakren… hynrei phim ju iakren bad ki lehnoh”, la ong u Putin ha ka jingialang pathai khubor ha ka telebishon.
Ki jingïeng kiba kham khlaiñ ki la wan hadien ba ki jingbthei thymmai jong ki namding bad ki drone jong ka Russia ki la pynïap ïa ym duna ïa ka 12 ngut ki briew ha Kyiv bad ki thaiñ ba marjan.
