Khliehriat, Nailur 03
Ka Dkhiah West SCSO ka la jam sha ka semi final jong ka lympung ïalehkai Second Division bad ka Borghat SCSC ha ka Third Division ba la pynïaid da ka East Jaiñtia Hills District Football Association, hadien ba ki la khur jingjop ha ka sngi Palei.
Ha ka jingïalehkai jong ka Second Division kaba la long ha madan Diengshynrum kaba ha Khliehriat, ka Dkhiah West ka la pynliem noh ïa ka Lama Youth SC (FT) lyngba ka tie-breaker da 7-6 kol hadien ba kine ki kynhun kim shym la lah ban thep kol haduh kaba kut ka por ïalehkai.
Haba phai sha ka jingïalehkai jong ka Third Division, ka Borghat ka la pynliem noh ïa ka Tongseng Youth SYSC (FT) da 1-0 kol bad ïa kane la thep da u Laxmon Kympad ha ka minit kaba 65.
Te kumta ka Dkhiah West ka la ïoh rung sha ka First Division, katba ka Borghat ka la jam sha ka Second Division ha kaba kin ïoh ban shim bynta naduh u snem ban wan.
