Washington, Nailur:
U nongbishar jong ka sorkar pdeng ha ka Sngi Balang, u la khanglad ïa ka sorkar Trump ban pyntreikam ïa ka hukum treikam ba thymmai kaba khanglad ïa ka jingdon ki briew kiba dei hok ban ïoh ïa ka jinglong nongshong shnong ba la kha ïa kaba u President Donald Trump u la pynmih hadien ba ka ïingbishar ba ha khlieh duh jong ka US ka la kyntait ïa ka jingpyrshang jong u kaba mynshwa.
Ka nongbishar jong ka US, ka Deborah Boardman ha Greenbelt, Maryland, ka la pynmih ïa ka hukum ba nyngkong halor ka jingkyrpad jong ki nongïakhih ïa ka hok jong ki nongwan buhai shnong kiba ha u snem ba la dep ki la ïoh ïa ka rai na ka ban khanglad ïa ka sorkar Trump ban pyntreikam ïa ka hukum treikam ba nyngkong jong u ha u snem 2025 kaba pynduna ïa ka jinglong nongshong shnong ba la kha.
Ka ïingbishar ba ha khlieh duh jong ka US ha ka 30 tarik u Jylliew ka la kyntait ïa kata ka jingpyrshang ba nyngkong ban pynkut noh ïa ka jinglong nongshong shnong ba la kha na ka bynta ki khynnah kiba ki kmie ki kpa jong ki kim dei ki nongshong shnong jong ka America ne ki nongshong shnong ba pura katkum ka aiñ, kiba la tip kum ki nongbat green card, da kaba shem ba ka pynkheiñ ïa ka kyndon jinglong nongshong shnong jong ka riti synshar jong ka US kaba 14th Amend.
Ka kyndon ka ai ïa ka jinglong nongshong shnong ïa kito kiba la kha ha ka ri America kiba “hap hapoh ka jingsynshar jong ka.”
Hadien kata ka rai, u Trump u la soi ïa ka hukum thymmai ha ka 6 tarik u Naiwieng kaba la shim kyrpang ïa ka jingthmu jong ka “jingjngohkai pyrthei ha ka por ba kha khun,” ha kaba ki kynthei ki leit sha ka ri America ban kha khun khnang ba ki khun jong ki kin lah ban ioh long ki nongshong shnong ba pura.
