UN, Nailur:
Katkum ka kaiphod jingwad bniah jong ka US, la lap ba ki don kumba 20 million ngut ki khynnah kiba pyndonkam internet ha ki 21 tylli ki ri jong ka pyrthei, kiba la shah pyndik ne shah ktah ha ki rynsan social media ha ka shi snem, ha kaba kiba bun ki jingjia ki jia ha ki social media platforms, ong ka kaiphod ba thymmai jong ka seng ai jingïarap ïa ki khynnah jong ka UN ha ka Sngi Palei.
La ong ba iwei na kitei ki san ngut ki khynnah kiba don hapdeng ki rta ba 12 haduh 17 snem ha kylleng ka Africa, Asia, Latin America bad Eastern Europe ki la mad ïa ki jait jingshah ktah bapher bad don ruh kiba shah ialam bakla ha ki rynsan online ha u snem shwa ban shah tohkit, la antad ka kaiphod jong ka UNICEF.
Kumba 15 million ngut ki khynnah ha ki ri ba la jurip, ki la shah ktah ha ka rynsan social media lyngba ki jingthoh lane ki dur bad ki video kiba iadei bad ka kam shongkha- shongman bad 9 million ngut pat ki khynnah, dei kiba la shah pynngop ne shah pynbor ban iadon bynta ha ki kam ba iadei bad ka laiñ shongkha ne ban iasam ïa ki dur lyngkhuit kiba iadei bad ka kam shongkha, bad 4 million kidei kiba la shah byrngem bad ki la hap ban sam ïa ki dur lyngkhuit jongki watla kim shym don ka mon ban leh hynrei ki la shah pynbor ha ki riew shim kabu, kiba la pynngop shwa ïa ki ha kaba sdang bad byrngem pat ïa ki ynda la ioh ban iakren ne ban don jingiadei.
Ka jingdon jong ki khynnah kiba shah ktah ha ka Social Media ha kylleng ka pyrthei, la i-kumba kam slem shuh ban kot sha ki phew million ngut, la ong ka khubor.
Kane ka jingwad bniah, kaba ka UNICEF ka la batai kum kawei na ki jingwad bniah ba heh duh jong ka jait jingwad bniah, la pynshong nongrim ha ki jingwad bniah jong ki nongmihkhmat jong ka ri, kiba la lum hapdeng u snem 2020 bad 2025 na kumba 21,000 ngut ki khynnah kiba pyndonkam internet ha ki 21 tylli ki ri, kiba kynthup ïa ka Kenya, Pakistan, Brazil bad Serbia.
