Washington, Nailur:
U President ka America, u Donald Trump, ula ong ba u long uba la pynkhreh ban pynlong biang ïa ka jingialang bad u president jong ka Russia, u Vladimir Putin, tangba tang ynda ka Moscow, ka la pynkhreh ban trei na ka bynta ban ioh ïa ka “jingïateh jingsuk” ban pynkut noh ïa ka thma kaba dang ïaid ha Ukraine.
Haba jubab halor ka jingkylli hato u Putin un mynjur ne em ban pynlong biang ïa ka jingïalang ha ka por ban wan, u Trump ha ka sngi thohdieng u la ong ba u ngeit ba u nongïalam ka Russia un kloi ban ïakynduh hynrei u la ban jur ba u kwah ba ka jingïalang kan long ha ka por kaba biang.
“U la leh ïa kata. Nga kwah, hynrei nga kwah ban leh ïa kata ynda ngi la pynkhreh ban leh ïa ka jingiateh jingsuk”, la ong u Trump ha ki nongthoh khubor ha Oval Office.
U Trump u la ong ba u kwah ba ka America kan pynneh ïa ka jingiadei kaba bha bad baroh ar tylli ki Russia bad ka Ukraine, da kaba kynthoh ba ka jingpynbha ïa ka jingiadei kan long ruh kaba myntoi na ka bynta ki kam khaii.
“Ngi kwah ban don ka jingiadei kaba bha bad ka Russia, ka Ukraine, bad baroh. To long kiba khraw na ka bynta ka kam khaii,” u la ong.
U President jong ka US u la pynpaw shuh shuh ba ka lah ban pynbeit mardor sa kawei pat ka jingïakynduh bad u Putin, hynrei u kham kwah ban ap haduh ba ka thma kan da jan kut.
