Shillong, Nailur 04
Ka 5th Sohra International Half Marathon 2026 ka la pynkut noh da kaba jop ha ka jylla Meghalaya ha kaba la khring haduh 11,672 ngut ki nongmareh na kylleng ka ri India bad nabar ri ruh kumjuh. La pynlong da ka Meghalaya State Olympics Association (MSOA) ryngkat ki kynhun ïalehkai jong ka Jylla bad la ithuh da ka Athletics Federation of India (AFI) bad ka AIMS, kane ka jingïalehkai ka la pyni ïa ka jingroi jong ka Jylla kum ka jaka ïalehkai ha ka pyrthei.
U Myntri ka tnad ïalehkai bad tnad samla (Sports and Youth Affairs) u Bah Wailadmiki Shylla u la kdew ba kane ka jingïamareh marathon ka la kiew na ka 750 ngut ki nongïashim bynta ha u snem ba nyngkong sha ka 12 hajar ngut. La khanglad ïa ki jingpynrung kyrteng ban pynneh ïa ka jinglong jingman kaba itynnad bad ba ïaid beit ïaid ryntih. U la ban jur ïa ka jingmih kaba bha jong kane ka lympung ïalehkai ha ka imlang sahlang ha ki homestays ha ka thaiñ, ka leit ka wan, bad ka rep ka riang, katba u dang khmih lynti ban pynlong ïa ka lympung ‘National Games’ kaba 39 ha u snem ban wan.
U nongïalehkai ‘Ultramarathon’ u Sukant Suki Singh uba long u nong India ba nyngkong eh ban pyndep ïa ki lai tylli ki jingïalehkai Ultramarathon kiba 200 Mile u la ïaroh ïa ki jingtei jong ka Meghalaya kaba iabeh katkum ka kyrdan ïalehkai ha ka pyrthei, da kaba khot ïa kane ka Jylla kum ka nongbah ïalehkai ha ka lawei. U la ai khublei kyrpang ïa u Myntri Rangbah, u Conrad K. Sangma, uba la pynkylla pura ïa ka rukom ïalehkai jong ka thaiñ bad ban pynroi tyngeh ïa ka sap ïalehkai naduh kiba dang rit.
U Satish Kumar Verma u la jop ha ka kyrdan jong ki shynrang jong ka Elite 21 km ha ka por (1:03:04), bad ka Tejaswini Narendra Lambkane ka la jop noh ha ka liang ki kynthei ha ka por (1:15:20).
Katba ha ka Meghalaya Open 21 km u Wolbetstar Ramsiej u la jop noh ha ka liang ki shynrang ha ka por (1:03:26), bad ka Marqueenless Ramsiej ka la long ka nongjop ha ka liang ki kynthei ha ka por (1:23:55).
Ha ka 10 km jong ka kyrdan (18-39 Age Group): U Wankyrmen L Mawphlang u la long u nongjop ha ka liang ki shynrang (28:28), bad ka Daplin Wahlang ha ka liang ki kynthei (37:20).
Ha kaba beh katkum ka kyrdan ha ki jingïalehkai ha kylleng ka pyrthei ha ka jingpynkup burom ïa ki nongjop, ha ka kyrdan Elite Category la pynkiew ïa ka song pisa da arshah, kaba kot K3,00,000 na bynta ka kyrdan 1st place, K2,00,000 na bynta kyrdan 2nd place, bad K1,00,000 na bynta ka kyrdan 3rd place. Bad ïa ki consolation prizes la sam mar K10,000 kata kiba don na ka kyrdan ba saw haduh ba phra.
Ka khusnam song pisa kaba K50,000 na bynta ki lahduh ha ka 21km Meghalaya Open champion, K30,000 na bynta ki nongjop ha ka 10km Meghalaya ki nongjop naduh 18-40 ngut, bad K25,000 sha ki nongjop ha ka 10km Meghalaya naduh 40-55 naduh bad 55 ngut shaneng kynthup ki ‘brackets’.
Ïa ka jingpynkhreh ïa kane ka lympung, ka jingpynïaid ïa ki lynti, bad ka jingpynïaid ïa ki paidbah la pyndep da ki kynhun ba la pynïadei jong ki nongtrei mon sngewbha bad ka Tnad Pulit jong ka Jylla. Ïa ka jingshngaiñ jong ki nongïashim bynta la buddien da ki kynhun sumar ba aiti lut kiba kynthup ïa ki doktor bad ki nongsumar, da kaba buh ïa ki jaka buh um ha ka rukom kaba ryntih ha ki lynti ba la buh.
Da kaba pynlong ïa ki jingïalehkai kiba kum kine ki kyrdan, ka Jylla ka thmu ban pynbiang ïa ka lad ïalehkai na ka bynta ki nongïalehkai na kane ka thaiñ katba ha kajuh ka por ka pynshlur ïa ki paidbah ban shim ïa ki rukom im kiba ïadei bad ka jingkoit jingkhiah.
