Shillong, Nailur 04
Ka Meghalaya Motorsports Society (MMS) ka sngew sarong ban pynbna ba ka Kong Phoebe Dale Nongrum, ka nongniah kali kaba tbit bha na Shillong bad ka President jong ka Meghalaya Motorsports Society (MMS), ka la shah jied ban mihkhmat ïa ka Team India ha ka Round 2 jong ka Asia Auto Gymkhana Championship 2026. Kane ka lympung ïakob niah kali kan long ha Tashkent, Uzbekistan, naduh ka 04 haduh 06 tarik Nailur 2026, ha kaba ka ïasoh bad ka kynhun India kaba don san ngut ki dkhot.
Ka Kong Phoebe Nongrum ka dei ka nongñiah kali ba nyngkong eh na ka jylla Meghalaya bad na Thaiñ Shatei Lammihngi (North-East India) ban ïashim bynta ha ka lympung ïalehkai Auto Gymkhana jong ka pyrthei.
Ha kane ka lympung ïakob Auto Gymkhana ka dawa na ki nongñiah kali ïa ka jinglong kaba thikna kaba stet, ki por ba stet ban shim rai haba niah kali, bad ka jingïakren ïa ki jingeh ha ki jinghikai ba ïadei bad ka jingstad, kaba ïapher na ki jingïakop niah kali kiba ju long bad ki jingïakop niah kali ha ka rukom kaba rim.
Ka wat ba nyngkong (Round 1) kala long ha Sokol International Circuit. Hadien na Uzbekistan, kane ka lympung kan leit sha Hong Kong, Thailand, India, bad Taipei China.
Ka la kylla long ka nongniah kali F4 kynthei kaba nyngkong eh na ka jylla Meghalaya bad ka thaiñ Shatei Lammihngi, kaba ïakhun bad ka Ahura Racing ha ka jingïakop jong ka JK Tyre (2020-2021).
Ka la long ruh kum ka Vice Champion ha ka liang ki kynthei ha ka Indian National Rally Championship (INRC) ha u snem 2024 bad 2025.
Ka kynthei kaba nyngkong eh ha ka histori jong ki jingïalehkai ban ioh lai tylli ki kyrdan ha ka podium, kynthup ïa ka jingjop ha ka kyrdan jong ki kynthei bad ban rung ha ka kyrdan ba saw ba hakhmat eh ha ka Dakshin Dare 2025.
Ka la pyndep kum kaba wan ha ka kyrdan ba ar ha ka kyrdan T1 Xtreme Category bad ban pynjop ruh ïa ka khusnam kum ka kynhun ba bha tam the (Best Team award) ha ka ‘Rally of the Himalayas’.
Ka Meghalaya Motor Sports Society ka la pynpaw ïa ka jingshahjied jong kane ka nongniah kali ka Kong Nongrum kum ka mawjam kaba kongsan, kaba pyni ïa ka jinglah jong ka ban pynïahap ha ki rukom ïakop niah kali bapher-bapher katba ka ai mynsiem ïa ki samla nongñiah kali khamtam eh ïa ki kynthei ha kylleng ka thaiñ Shatei Lam Mihngi jong ka Ri India.
