Nongstoiñ, Risaw 21
Kum shi bynta ban kynmaw ïa ka jinglen lade jong ki pulit ne ka Police Commemoration Day, ka tnad pulit jong ka West Khasi Hills ha ka sngi Balang ka la pynkut noh ïa ka lympung ïalehkai phutbol ba la tip kum ka (L) Inspector Betly Ryntathiang Memorial Inter Unit Football Tournament” lem bad ka (L) Constable Rel Deo Sangma Inter Unit Carrom Board Tournament”
Ha katei ka jingïalehkai phutbol, ka SP Office – 1 ka la khur ïa ka nam lahduh hadien ba ka la pynliem noh ïa ka Athiabari OP Combined Malangkona OP lyngba ka tie-breaker da 6-5 kol, hadien ba ka por ïalehkai ka la kut ha ka jingïakhaid da mar shi kol ha madan Mawkadiang, West Khasi Hills. Ïa ka nam Top Scorer la khur da u Kynjohborlang Diengdoh na ka SP-2.
Haba phai pat sha ka lympung ïalehkai carrom, ïa ka nam lahduh la khur da u ABC John F. Khyriem na Nongstoiñ PS, katba ïa ka nam lahduh ha ka Double la khur da u UBC Emil Mawlot bad u ABC John F.Khyriem na Nongstoiñ PS.
Ha katei ka sngi la ïadon lang u Superintendent of Police, West Khasi Hills u Bah H. Kharkongor (MPS), u Bah GAL Marshillong, Addl. Superintendent of Police ryngkat ki pulit ophisar na kylleng jong ka district lem bad ki bahaïing hasem jong u (L) Betly Ryntathiang, ki nongïalam shnong ka shnong Mawkadiang ba kynthup ïa u Bah H.Thnongni, Rangbah Dong kiba la sam ruh ïa ki khusnam bapher bapher.
