Shillong, Risaw 21
Ka Nongkseh Sports and Cultural Club (S&CC) ka la long ba la pynkhreh ban ïashim bynta ha ka lympung ïalehkai I-League 3 ban pynlong da ka All India Football Federation (AIFF) ka ban sdang naduh ka sngi Palei ha kane ka nongbah.
Kane ka kynhun ïalehkai ka nongbah kaba la rah ïa ka nam lahduh ha ka SSA Super Cup 2026, kan ïakhun nyngkong ha ka Group-C pyrshah ïa ka Kuppuraj FC kaba na Madhya Pradesh, ha ka por 5 baje janmiet ha SSA Stadium, Polo.
Kum ka jingpynpaw da ki bor pynïaid la ong ba kane ka klob kan pynïalehkai tang da ki rangïalehkai na kane ka Jylla namar ka thong ka long ban kyntiew ïa ki rangïalehkai kiba na kane ka Jylla ba kin ïoh ban shim bynta ha ki lympung ïalehkai ba kham heh ha ka ri.
U President ka klob bad uba long ruh u Manager kane ka kynhun u Bah Daniel Thangkhiew haba ïakren bad ki nongthoh khubor ha ka sngi Balang, u la ïathuh ba ka klob ka la soi biang sa 3 ngut ki rangïalehkai kiba na kane ka Jylla. Kine ki kynthup ïa u Ieidlang Syiemlieh bad u Owanijuh Pajuh, kiba ïalehkai na ka Bhawanipur FC ha ka Calcutta Premier League lem bad u rangapkol ka Shillong Lajong FC, u Wanteilang Malngiang.
Ka jingïoh rung ka Nongkseh sha ka I-League 3 ka long hadien ba ka la rah ïa ka nam lahduh ha ka 5th Meghalaya State League (MSL 5) dangshen mynta u snem bad ka long ka sien kaba nyngkong eh ïa kane ka klob ba kan rung sha kane lympung. “Kin don haduh 19 tylli ki kynhun ki ban shim bynta ha kane ka lympung,” la ong u Bah Thangkhiew.
Kumjuh u coach kane ka kynhun u Joseph Naik u la pynpaw ba kum ka kynhun ka la lah ban ïalehkai bha ha ka Shillong League bad kumjuh ha ka MSL. “Ka I-League 3 ka long sa kawei pat u mawjam ïa ka klob bad kum ka klob ka donkam ban ïalehkai bha namar kane ka lympung ka dei kaba kham heh.”
“Ngi don ïa ka kynhun kaba khlaiñ bad mynta ngi la lah ban wanrah biang sa lai ngut ki rangïalehkai kiba thymmai. Ka jingangnud ka jong ngi ka long ban ïalehkai bha bad ban pynpaw ïa ka mynsiem ïakhun pyrshah ïa ki kynhun kiba nabar. Nga sngew kmen ba kum ka klob shnong kaba don ïa ki nongkyrshan ha syndah, nga kyntu biang ïa ki paidbah ba kin wan ban ai jingkyrshan namar ka jingdon lang ka jong ki ka long ka jingai mynsiem ïa ka klob hi baroh kawei.”
Haba phai sha ki kynhun kiba la don ha katei ka group, u Naik u la ong ba ki kynhun ka liang pyrshah ki long kiba khlaiñ namar ki la long ki lahduh ha la ki jong ki lympung ïalehkai na ki jylla jong ki. “Te kumta watla ngi la ïoh ban ïalehkai ha la ïing, hynrei kum ka kynhun ngim dei ban kheiñ sting ïa ki.”
Kiwei pat ki kynhun kiba ka Nongkseh kan ïakhun kin long pyrshah ïa ka Chhaygaon FC (Assam) ha ka 24 tarik, kumjuh ïa ka Lakecity FC ha ka 28 tarik bad ha ka 30 tarik ïa ka Godavari FC.
