Shillong, Nailur 06
Ka kynhun ïalehkai ka Jylla kam shym la lah ban jam sha ka semi final ha ka Junior Boys National Football Cham-pionship 2026-27 (Tier 1) na ka bynta ka Dr BC Roy Trophy, hadien ba ka la shah rem noh ha ka jingïalehkai kaba khatduh jong ka Group-C ha ka Mizoram da 3-0 kol ha ka sngi Saitjaiñ ha Bengaluru.
Ha ka jingshisha kine ki kynhuñ ki la kamai mar 6 poiñ hashwa ban sdang kane ka jingïalehkai kaba khatduh, hynrei ka Mizoram ka la tam lyngba ka jingïapher ha ka jingthep kol (+9 la +4), te kumta ka Meghalaya ka donkam ban khur jingjop khnang ba kan lah ban jam sha kawei pat ka wat jingïakhun.
Ha kine ki jingïalehkai ba la lah, ka Meghalaya ka la pynliem ïa ka Tamil Nadu da 2-1 kol bad ïa ka Maharashtra da 3-0 kol, katba ka Mizoram ka la jop da 7-0 kol bad 2-0 kol pyrshah ïa kitei ki kynhun.
U coach ka kynhun ïalehkai ka Meghalaya, u Playerson Jitem Syiem-lieh u la pynskhem beit da kane ka kynhun kaba la ïalehkai ha ki ar tylli ki jingïalehkai ba la lah.
Ha ka jingshisha ha kaba sdang ka Meghalaya ka la lah ban ïalehkai bha, hynrei ki rangïalehkai ka Mizoram ki la long kiba kham tbit ha kaba ka la ïoh ban pynkhih jar nyngkong eh lyngba u C Lalhmingropuia’s (25′), uba la ïoh ban shut tyngeh sha kol, ha kaba u rangapkol ka Meghalaya u Alvin Kharbani um shym la lah ban pyllait na ka jingshah thep.
Ha kane ka jingïakhun jong ka kylla step u coach ka Meghalaya u la hap ban kylliang noh ïa ar ngut ki rangïalehkai khnang ba kan lah ban pynphai. U Mangpaka Nongkynrih bad u Skhemlang Mar-thong kiba la mih bujli ha ka jaka u Aiborlang Mulieh bad u Pyrkhatlang Marbaniang.
Hynrei ka Mizoram ka la ïoh biang ïa ka kabu ksiar ha ka kylla miet na ka bynta ban thep biang ïa ka kol kaba ar lyngba Lalhmingropuia’s (56′). Kane ka kynhun ka la thep biang sa shi kol hashwa ban wai lyngba u Malsawmtluanga (90’+1) bad ban khur syndon ïa ka jingjop.
Haba ïanujor ha ka jingïalehkai (group) ha u snem ba la lah, lah ban ong ba kane ka kynhun ïalehkai ka Jylla ka la kiew shaphrang ban ïa kaba long ha u snem ba la lah (2025-26) ha kaba ka la shah rem ha baroh lai tylli ki jingïakhun. Te kumta la khmih lynti ba kan wanphai da ka jingkhlaiñ bor haba kan shim bynta biang ha u snem ban wan.
Ki kyrteng ki rangïa-lehkai ka Meghalaya ki long u Alvin Kharbani (GK), Shanborlang Khong -jee, Franky Kharkrang, Samuel Malieh, Wallam-bok Thongni, Pyrkhatlang Marbaniang (sub Skhem-lang Marthong HT), Andrew Kharsati (sub Sannaky Nongsiej 69′), Aibannangkhraw Kharumnuid (sub Mal-lenga N Sangma 87′), Adriel B Nongbet (sub Kishan Wahlang 69′), Aiborlang Mulieh (sub Mangpaka Nongkynrih HT) bad u Habankhlur Lyngdoh Mawnai.
