Shillong, Nailur 06
Ka jingïaid lynti ka North Liberty Higher Secondary School ha ka 65th Subroto Cup International Football Tournament ka la poi sha kaba kut, hadien ba kane ka kynhun ïalehkai U-15 boys ka la ïakhaid mar 1-1 kol bad ka CBSE na Uttarakhand myn ha ka 4 tarik ha Bengaluru.
Ha ka jingïalehkai kaba nyngkong ka North Liberty kaba na Jowai, ka la jop da 5-0 kol ïa ka DNH&D, katba ka CBSE ka la thep haduh 10-0 kol ïa ka DNH&D. Te kumta CBSE ka la jam sha ka quarter final na ka Pool-F lyngba ka jingïapher ha ka jingthep kol (+10 la +5).
Te kumta ka North Liberty ka la hap ban wanphai noh sha la ïing, hynrei la khmih lynti ba kane ka kynhun kan wanphai da ka jingkhlaiñ bor ha ki snem ki ban wan.
Nalor ka North Liberty bad ka Little Star English Medium School (U-17 girls), ka Jylla ka dangsah sa tang ka skul OM Roy Memorial HSS (U-17 boys) ka ban shim bynta ha kane ka lympung. Te kumta la khmih lynti ba kane ka kynhun kan ïalehkai bha ha kane ka kynti khnang ba kan wanrah biang ia ka nam jop sa shisien pat ha kane ka lympung.
