Jowai, Nailur 06
Ka Thadlaskeiñ Sports Association (TSA) ka la sdang ïaka lympung ïalehkai na ka bynta kiba la rangbah ba la tip kum ka 1st Veterans Cup 40-Above Football Tournament, ha ka sngi Saitjaiñ ha madan Multi Sports Complex, Wahïajer.
Ha ka jingïakhun jong kane ka sngi sdang, ka Porto FC ka la khur ïa ka jingjop hadien ba ka la pynliem noh ïa ka Shynnam FC da 2-1 kol. Kane ka nam jop ka la wan urlong lyngba u Banmanaibor Nongkhlaw, uba la thep ar kol ha ka minit kaba 6 & 13. Hynrei ka Shynnam ka la pynphai kylla lyngba u Jibanroy Khongbuh (19).
Ha ka jingïalehkai kaba bud, ka Nuksa FC ka la pynjem khnap ïa ka Friends 40 da 13-1 kol. U John Bistar Nongsiang u la thep marwei haduh san kol ha ka minit kaba 24, 36,48,57 & 64, kumjuh ïa ki ar kol la thep da u Ebormi Buam (18 & 54), Wasting Nongkhlaw (48 & 62) bad u Brolington Warlarpih (60 & 65), ïa ki shi kol la thep da u Janbor Marbaniang (22) bad u Kerry Pyngrope (29). Katba ka Friend 40 ka la pynphai kylla shi kol lyngba u Golden Mukhim (52) hashwa ba kan mad ïa ka jingshah rem.
