Tehran, Nailur:
Katto- katne tylli ki liengsuiñ shipai jong ka US, ki la shah pynjulor ha ka jingleit hiar thma jong ka Iran, ha ka shi-miet, ha ka ktem liengsuiñ jong ka America, ha Jordan, ong ka khubor jong ka CBS.
Kawei ka liengsuiñ A-10 Thunderbolt, kaba la tip kum ka Warthog, ka la shah tynrah bad ka la jah bad ka tyrpeng kaba la jah, katba kumba 8 tylli ki liengsuiñ F-15, ki la shah pynjulor khyndiat bad la buh biang ïa ki ha ka kam, ha ka por ba ka Iran, ka la hiar thma ha Muwaffaq Salti Air Base, ong ka nongthoh khubor jong ka CBS, ka Jennifer Jacobs, ha ka jingthoh jong ka X Jacobs.
“Ki shipai America ha Jordan ki la siat palat 30 tylli ki namding Patriot ban iada na ki jingshah thombor jong ka Iran. Ka jingjulor kaba la jia ha ka miet ka la jia hadien ba ka US ka la hiar thma ïa phra tylli ki jhad kit um jong ka Iran kum ka jingpynshitom bein ïa ka Iran kaba la thmu ïa ka jhad shipai duriaw jong ka US.” la thoh.
Ka US ka don da ki phew tylli ki liengsuiñ thma kiba treikam na ka Muwaffaq Salti Air Base, kaba trei kum ka jaka pdeng bor liengsuiñ kaba kongsan na ka bynta ki kam pyrshah ïa ka Iran.
Kane ka jingthombor ka la jia hadien ba ka US ka la pynngam ïa phra tylli ki jhad kit umphniang jong ka Iran ha kaba sdang jong kane ka taiew, bad ka Iran ka la siew kylliang da kaba bom ïa ki bun tylli ki ktem bad ki paralok jong ka America ha kane ka thaiñ.
Ha ka jingpynbna ba thikna ba la pynmih da ka tnat pathai khubor IRNA ba la kyrshan da ka sorkar, ki shipai pahara jong ka Iran ki la pynbna ba ki la “hiar thma ïa ka ktem jong ki shipai Al-Azraq jong ka America ha Jordan da ki jingsiat namding ba jur” kum shi bynta jong ka “jingpynshitom” ba la buh kyrpang. Ka Tehran ka la ong ruh ba ka la thombor ïa palat shispah tylli ki jhad kiba pyrshang ban ïaid lyngba ka Strait of Hormuz, namar ba ka la pynbna ïa ka jingpynheh ïa ka jaka bym dei ban leit shabar jong ka lynti um ba kongsan kaba ka la khang la bun bnai.
Kham hadien katei ka jingshah pynbthei, ki shipai Jordan ki la pynbna ba ka tnat iada suin jong ka ka la khanglad bad pynduh ïa ki bom kiba wan. Katkum ka jingpynbna jong ki shipai, ki kor ïada jong ka Jordan ki la lap ïa ki 20 tylli ki namding ba wan rung, ha kaba ki la lah ban tehlakam ïa 18 tylli napdeng jongki baroh, katba ar tylli ki la leit bthei sha ki jaka bym don briew.
