Kyiv, Nailur:
U Jonas Gahr Store, u Myntri rangbahduh jong ka Norway, ha ka Sngi Balang u la pyntip ba ka liengsuiñ, kaba kit ïa U President jong ka Ukraine, U Volodymyr Zelensky, na Moldova, sha Oslo, naka bynta ka jingleit ontep ïa U Syiem Harald jong ka Norway, ka la jan shah thombor ha kawei ka drone kaba la iakynduh ha ka lynti ïaid jong katei ka liengsuiñ katba dang kit ïa u.
“Ka liengsuiñ jong u, ka la jan shah tynrah ha ka drone, ha ka por ba ka dang kiew na Moldova. Kata ka dei ka jingshisha kaba u im,” ong u Store, ha ka tnat pathai khubor paidbah jong ka Norway, NRK.
Um shym la ai jingtip shuh shaphang katei ka jingjia. U Zelensky, ula poi ha Oslo, ha ka janmiet jong ka Sngi Balang, ha kaba u la ïakren bad u Store, u Myntri ka tnat pla tyngka, u Jens Stoltenberg bad u Myntri ka tnat kam bar ri, u Espen Barth Eide, halor ka jingïarap jong ki shipai jong ka Norway, kaba kynthup ïa ka jingkyrshan ïada na suiñ, bad ka jingïarap ïa ki riew paidbah.
Ha ka Sngi Balang, u Zelensky, u la ïadon bynta lang bad kiwei pat ki riew pawkhmat nabar ri ban leit sha ka jingleit on tep ïa u Syiem Harald, uba la khlad noh ha ka 28 tarik u Naiwieng ha ka rta kaba 89 snem.
U Zelensky, ula mih noh na Norway, hadien ka jingleit ontep, ula leit sha Canada bad ula iakren bad ki nongialam hangtei, ong U Store, ha ka NRK.
