California, Nailur:
Katkum ki khubor, la iathuh ba ki kynhun pyllait im ki dang bteng ka jingiakhun ban ioh pyllait im ïa uwei u nongkiew lum ha ka thaiñ Fresno County jong ka nongbah California hadien ba utei u briew u la mynsaw na ka jingleit hap bakla na kliar jong utei u lum uba don kumba palat 700 phut ka jing jrong. Kumta ki kynhun iarap ki la shu phah wanshaw noh da ka liengsuiñ rit ban ioh ban pynkit ïa utei u nongkiew lum, uba la donkam ïa ka jingïarap ba kyrkieh bad ban ioh sumar bniah ha ka por kaba kloi eh.
Ka tnat pahara surok jong ka California Highway Patrol’s (CHP) Coastal Division Air Operations ka la pyntip shaphang kane ka jingjia ha ka jingpynbna hapoh ka rynsan paidbah ‘Facebook’ ryngkat bad ki dur video jong ka jingpyllait im ïa utei u briew ha katei ka jingjia. Katei ka kynhun, ka la pynbna ïa ki khubor, ba uwei u nongkiew lum, u la hap na kliar jong utei u lum, uba la tip kum u “Power Dome”, ha ka 11 tarik u Nailur. Utei u kliar lum, uba don hajan ka jaka pynlang um jong ka Courtright, u don ruh ha ka thaiñ Shatei Lam Mihngi jong ki Lum Sierra Nevada.
Kumta la ong ba ka liengsuin H-70, ka la leit poi sha katei ka jaka, na ka jaka ieng jongka, kaba don ha Paso Robles kad liengsuin, ha ka thaiñ Sepngi jong ka nongbah California. Kane ka liengsuiñ ka don ïa ki nongtrei kiba kynthup ïa u nongñiah liengsuiñ bad uwei u ophisar/nongsumar na katei ka liengsuiñ, uba trei ruh kum u nongpynïaid ïa ka liengsuiñ.
Nangta la tan bad pynkit ïa u nongkiew lum sha ka kali sumar kaba ap ïa u hangta. Ka CHP ka la ong ruh ba ki nongtrei jong ka ki shaniah ha ka jingïatreilang jong ki tnat ba ïatreilang, khamtam eh ki dkhot jong ka kynhun HRT, ban pynthikna ïa ka jingmih kaba shngaiñ tam. Ka la ai khublei ïa baroh ki tnat kiba la iashim bynta ha ka jingpyllait im.
