Kyiv, Nailur:
U President ka Ukraine, u Volodymyr Zelensky, ha ka Sngi Nyngkong u la ong ba ka Ukraine ka long ba la pynkhreh ban sangeh noh ïa ka thma bad ka Russia lada u nongïaleh pyrshah jongka un leh kumjuh bad kane ka long hadien ba u President jong ka US- u Donald Trump u la pynbna ba kitei ki arliang mamla ki la mynjur ban pynkut noh ïa ka jingiakynad bad ka jingthombor sha ki shlem pynmih bor ding.
Da ka jingkiew dor biang jong ka umphniang ha ka pyrthei, u Trump ha ka taiew ba kut u la kynthoh ïa ka jingthombor jong ka Ukraine ïa ki karkhana pynkhuid umphniang jong ka Russia, da kaba kynnoh ba dei kane ka daw kaba wanrah ïa ka jingkyrduh ka umphniang ‘diesel’.
Ha kawei na ki jingthoh ba phylla jong u ha ki social media, une u nongïalam jong ka US u la pynbna ha ka sngi Nyngkong ba ka Ukraine ka la mynjur ban nym ther ïa ki shlem treikam ba kongsan jong ka Russia bad ba ka Russia ruh ka la mynjur ban leh kumjuh.
Ka Russia kam shym la kren eiei mardor halor kane ka bynta. Hynrei ha ka jingkren jong u kaba man ka sngi, u Zelensky u la pynpaw ïa ka “jingtyrwa kaba tikna na ka ri America ha kaba iadei bad ka jingpynsangeh lang ïa ki jingthombor sha ki jingtei kiba kongsan jong baroh arliang ri”.
U la bynrap, “Lada kane ka lah ban long ka sienjam ba nyngkong eh ban pynduna ïa ka jingeh – ban pynsangeh ïa ki jingshah thombor jong ka Russia ha ki jingtei ba kongsan jong ngi, bad ka jong ngi kum ka jingkynthoh – te ka Ukraine ka long kaba la pynkhreh ban kyrshan ïa ka jingpynjem ïa ka jingeh.”
U Zelensky u la ong “ngi iohi ba ki nong Russia ki sngew ïa ka jingeh namar ki jingkynthoh ba thikna jong ngi pyrshah ïa ka ioh ka kot jong ka thma jong ka Russia”.
U la kdew ba “haduh mynta ym pat don mano mano ba la iohi ïa kano kano ka jingkwah ba shisha na ka Russia ban iaid sha ka jingpynkut noh ïa ka thma”.
