Washington, Nailur:
Ki nongthaw aiñ jong ka US, ki la mynjur ïa ki jingpynjari kyndon ba thymmai, kiba la thmu ban pynjynjar ïa ka Russia, halor ka thma jongka, ha Ukraine, ha ka sngi thohdieng, da kaba phah ïa kane ka aiñ, sha u President Donald Trump, hadien ba ki la pynslem da ki bnai.
Ka ïing dorbar thawaiñ ba la ïalam da ki Republican ka la mynjur ïa kane ka package da 262-159, kaba la ai ïa ka jingshai ba khatduh jong ka dorbar thaw aiñ jong ka US pyrshah ïa ka Russia naduh ba u Trump u la wanphai biang ha ka kam.
U Trump, u la ong ba un sa soi ïa katei ka ain, kaba la iaid lyngba ka Senate, ha ka jingthep vote kaba 86-11 ha u bnai ba ladep.
Kane ka aiñ ka thmu ïa ki tnat bor ding bad ïada ri jong ka Russia, u President Vladimir Putin bad kiwei kiwei ki heh ophisar, bad kumjuh ruh ïa kaba la khot ka shadow fleet jong ka Russia jong ki jhad tanker ba la pyndonkam ban ïaid lait ïa ki jingpynjari jong ki ri Sepngi.
Ka ai bor ruh ïa u Trump ban buh khajna haduh 100 percent ïa ki nongthied ba kongsan jong ka umphniang bad ka gas jong ka Russia, kynthup ïa ka China bad ka India kaba lah ban long, ha ka jingpyrshang ban khanglad ïa ka jingmih kaba bei tyngka ïa ka thma jong ka Russia.
Hynrei ka bor khajna kaba heh jong ka ka la pynmih ïa ka jingïapher kaba pher hapdeng ki Democrats, kiba kyrshan palat ïa ka Ukraine hynrei ki la pyrshah ban aiti ïa u Trump ïa ka bor kaba kham heh halor ka khaii pateng.
U Gregory Meeks, uba long u Democrat ba ha khlieh duh ha ka komiti ba peit ïa ki kam bar ri jong ka iing dorbar, u la khot ïa katei ka bill, kaba “don jingduna bha.”
“Ki nongïasaid aiñ jong ka White House ki la shna ïa ka jingthoh kaba mynta ban pynheh ïa ka bor jong u President Trump ban buh khajna thymmai ïa ki mar rep halor ki paidbah America, bad ban pynduna ïa kano kano ka jingkitkhlieh ban pynjari shisha ïa ki jingpynjari thymmai ïa ka Russia lane ki nongpynlah ïa ka,” u la ong.
U Meeks u la ong ba un kyrshan ïa katei ka ain lada weng noh ïa ki kyndon khajna ba ar, hynrei ki Republican ki la kyntait ïa ki jingpynkylla kiba thmu ban pynrit ïa ki.
