Dubai, Risaw:
U Mohsen Paknejad, myntri umphniang jong ka Iran, ula iehnoh ïa ka kam bad u Hamid Bovard, uba dei u heh duh jong ka National Iranian Oil Company, kaba dei jong ka sorkar, un bat ïa katei ka tnat, kum u myntri ba shipor, la iathuh ki lad pathai khubor jong ka Jylla, ha ka Sngi U Blei, khlem da ai ïa ka daw jong ka jingiehnoh kam jongu.
U Mohsen Paknejad u la long u myntri umphniang jong kane ka ri kaba don ha ka OPEC naduh u Nailar 2024 bad u la iehnoh ïa ka shuki namar ba ka thma kaba hynriew bnai hapdeng ka Iran bad ka US ka buh jingeh ïa ka ioh ka kot jong kane ka ri.
“Da ka jingpdiang ïa ka jingrisaiñ jong u Mohsen Paknejad da u Dr. Pezeshkian [u president ka ri], la thung ïa u Hamid Bovard kum u myntri umphniang ba shipor”, la kdew da ki lad pathai khubor jong ka jylla ïa ka jingong jong uwei u heh ha ka ophis jong u president.
La kdew ïa u Paknejad da ki lad pathai khubor jong ka sorkar jylla, ha shwa ka khubor jong ka jingrisain jong u, ba u la ong “ki jingmih na ka umphniang ba ngi la die ki dang wan bad kata kan dang ïai bteng lada ka long ka mon jong U Blei”.
