France, Risaw:
U Myntri ka tnat pule – puthi jong ka France u la iathuh ba palat 500 tylli ki skul ha kylleng jong ka ri France ki la khang khyrdep ha ka Sngi Nyngkong hadien ka jingiakhih jong ki samla pule kaba la pynkhihwin ïa ka ri baroh kawei.
Ki jinghikai ki lah ban shah pynsangeh lut lane kumba shi bynta ha ki katto katne “400-500 tylli ki skul heh namar ba ki kyndon pahara kim shym long kiba tikna, la ong u Myntri Pule Puthi Edouard Geffray ha ka Sngi U Blei, da kaba pynshai ruh ba 24 tylli ki skul ki la shah “thang ne shah pynjulor” naduh ba sdang ka jingiakhih.
Utei u heh u la pynshai ba kane ka jingkhang khyrdep ïa ki skul bad jaka pule ka long shi bynta ban tehlakam ïa ki jingma kiba lah ban mih na katei ki jingïakhih kiba heh kiba ki nongïalam jong ka seng ki la khot ha ka sngi Balang.
Ki samla ha ki skul heh jong ka ri France, kiba la tip kum ki lycees, ki ong ba ka jingpule jong ki, ka shah pynsniew namar ka jingbym don nonghikai kaba bun, ki sngi skul kiba slem palat bad ki jaka pule kiba la jot rathai, bad kumjuh ruh kiwei kiwei ki jingsngewsih.
U Geffray u la ong ba ka jingdon jong ki skul kiba shah ktah ha ka sngi Nyngkong kan long kaba lah ban ianujor bad ka jingkhein naduh ka sngi Palei hynrei u la kular ba kan don ka “jingwanphai biang kaba shibynta, kaba iaid shaphrang sha ki jinghikai”.
Kane ka jingïakhih ka la sdang na kawei ka skul ha Paris ha ka 17 tarik u Nailur hynrei ka la nangroi ha ka taiew ba la dep sha ki jingïakhih ha baroh kawei ka ri kiba la paw ha ki jaka da ki jingbthei jong ki jingïakhih kiba la ïadon bynta da ki samla bad ki bor pahara, kiba teng teng ki pyndonkam da ki lyer pynjah ummat bad ki diengpyngkiang ban pynpra ïa ki khynnah skul.
