Shillong, Naiwieng 04
U Myntri Rangbah ka Jylla u Conrad K. Sangma u la ong ba ka National Games ha u snem ban wan kan long ka jingïalehkai kaba heh tam kaba ka jylla Meghalaya kan pynlong ha ka histori ba 54 snem jong ka.
Ïa kane u la pynpaw ha ka jingïalang plie ïa ka District School Education Office-cum-Multilevel Car Park ha Mawkhar bad ka Multilevel Car Park ha Motphran, ha ka sngi Balang.
U Conrad u la ong ba ka Sorkar Jylla ka dangpynkhreh na baroh ki liang ban pynlong ïa kane ka lympung kaba don burom bad ki dkhot ka organizing committee jong ka Indian Olympic Association ki dangdon hangne ka nongbah ban ïakren halor kane ka jingpynkhreh.
“Kane ka dei khamtam kawei na ki lympung kiba heh tam kaba ka Meghalaya kan pynlong ha kine ki 54 snem ba la dep bad kumta kane ka dei ka por kaba kongsan bha na ka bynta jong ngi. Ngi dangpynkhreh ïa baroh ki jingdonkam. Ki dkhot ka organizing committee na ka IOA ki don ha Shillong mynta hi ban ïakren ïa baroh ki jingtip kiba bniah bad ka Sorkar Jylla halor kane ka jingpynkhreh,” u la bynrap.
Haba khot ïa ka jingïatreilang, u Myntri Rangbah u la ong, “Kane kam dei tang ka jingleh jong ka Sorkar, hynrei ka dei jong ka jylla Meghalaya. Man uwei pa uwei u nongshong shnong u don ka bynta ban leh, baroh ki don da ka bynta ban noh synñiang.”
“Wat lada ngi lah ban shu pyni ïa ka mynsiem kaba phuh samrkhie bad ban pdiang ïa kiba nabar da ka dohnud kaba sngewkmen, kita ki long long ki jingnoh synñiang jong phi. Ban ai ka jingiada ïa ki nongïalehkai kiba wan na shabar, ban pynlong ïa ki ban sngew kumba ki don ha ïing, ban pynlong ïa ki ban sngewthuh ïa ka jingkordor ka kolshor jong ngi bad ka jingpdiang sngewbha jong ngi, kata ka dei ka jingnoh synñiang kaba ngi iwei pa iwei ngin ai.”
U Conrad u la ong ba ka Sorkar ka dang ap ïa ki tarik jong u Myntri Rangbahduh ka ri u Narendra Modi na ka bynta katei ka lympung, kaba lah ban long ha u Lber, bad u la pynpaw ïa ka jingsngewskhem ban pynlong ïa kane ka lympung kaba pynsahkynmaw.
“Nga ngeit skhem ba ngin leh bha ïa ka. Ngi khmih lynti ban ïatreilang bad uwei pa uwei u nongshong shnong ban pynlong ïa katei ka lympung kum kawei na ki jingïalehkai kaba pynsah jingkynmaw,” la bynrap biang u Conrad.
