Shillong, Naiwieng 09
Ka Mawpat SC ka la ïeng skhem ban pynïakhaid mar 2-2 kol pyrshah ïa ka Mawpdang SC ha ka jingïalehkai ka Group-A jong ka SSA Champions Cup 2026 ha ka lah sngi U Blei ha SSA Stadium, Polo.
Kane ka jingïakhun ka long kaba itynnad bad kaba ïakhaid bha hadien ba u Donlad Diengdoh u la lah ban lamkhmat ïa ka Mawpdang ban thep ïa ki artylli ki kol ba la wan ha ka minit kaba 1 bad kaba 13.
Hynrei ka kynhun ïalehkai ka Mawpat ka la ïakhun tyngeh bad shwa ban kut ka kylla step, ka la ïoh ïa ka kabu ksiar ban pynphai shwa shi kol lyngba u Dajiedlang Wan-shnong (45′) bad ïa ka kol kaba ar la lah ban pynïa-khaid da u Donboklang Lyngdoh (59′).
Kane kan dei ka jingïakhun ba nyngkong ïa ka Mawpdang ha kane ka lympung hadien ba ka la rah ïa ka nam lahduh ha ka U-20 Fourth Division mynta ka snem, kaba ha kane ka kynti u Donlad u dei u rangïalehkai uba ka la shim kylliang (on-loan) bad bynrap da ka jingshim ïa kiwei pat ki rangïa -lehkai kum u Atlanson Kharmaw, Manbhalang Nongmin bad Dibinroy Nongspung, kaba la pynkhlaiñ bha ïa kane ka kynhun.
Katba ka Mawpat kaba wan ba-ar ha ka Second Division, kan dei ka jingïakhun kaba ar ïa ka ha kane ka lympung kaba la wan hadien ba ka la lah ban pynliem ïa ka Nong -krem ha ka jingïakhun ba nyngkong.
Hadien ba ka Maw-pdang ka la tam shakhmat, ka Mawpat kam shym la shu ïalehkai suki, hynrei manla u rangïalehkai jong ka, u la ïeng ban ïakhun tyngeh. Na ka liang ka Mawpdang I kumba kan jam shakhmat ryngkat bad ka jingjop na kane ka jingïakhun, hynrei ka kylla miet, ka rukom ïalehkai kaba kham bha ka la noh sha ka Mawpat, namar ka la ïakhun tyngeh watla ka la shah tam shakhmat
Namar ba ka kut ïalehkai ka Mawpat ka long kaba skhem, ka Mawpdang ka la shim ïa ka sien jam ban pyrshang ban khyrwit jam kham na jngai ïa ki bol, ha kaba la don ruh ki khep ba kane ka jingthmu ka la jan urlong ruh wat sha ka kol. Kumta ha kaba kut, kine ar kynhun ki la hap ban ïasam mar shi point.
Ha ka sngi Ba-ar ka jingïakhun kan dei jong ka Group-A ha kaba ka Lawlynti kan mih madan ban ïakhun pyrshah ïa ka Nongkrem ha ka por 2:30 nohphai sngi.
