Shillong, Naiwieng 09
Ka All Meghalaya Sepaktakraw Association (AMSA) ka la pynpaw ïa ka jingsngewdiaw ba ka Meghalaya State Olympic Association (MSOA) kam shym la pynrung lang ïa ka jingïalehkai Sepaktakraw ha ka 39th National Games ka ban sa long ha ka jylla Meghalaya ha u snem ban wan.
U President ka AMSA u Bah Samuel Hashah haba ïakren bad ki nongthoh khubor ha Shillong Press Club, u la pynpaw ïa ka jingsngewkhia haba ïa dei bad ka jingbym kynthup lang ïa ka Sepaktakraw ha ka National Games 2027.
Kane ka jingïalehkai Sepaktakraw ka la ïoh rung khatduh ha ka 37th National Games kaba la long ha Goa.
U Bah Hashah u la ong ba ka jingbym kynthup lang ïa kane ka jingïalehkai ka long ka jingduh kaba khraw ïa ki samla kiba ieid ban ïalehkai ïa kane ka jingïalehkai. U la ïathuh ruh ba kane ka jingïalehkai ka dei kaba la sdang ha Malaysia bad ha ka jylla jong ngi ruh ka la don bad ki la leit ban ïashim, bynta ha ki jingïakop ba pher bapher. Ki khynnah ki la ïoh ïa ka jinghikai kaba biang ha kylleng ki jaka bad ruh ha SAI Training Centre kaba don ha NEHU. Ki khynnah kim dei shuh kiba dang thymmai ki ban ïalehkai ïa kane ka jingïalehkai.
U la ïathuh ruh ba ka kynhun ka la ai da ka jingthoh sha u Myntri Rangbah ka Jylla, kumjuh sha u Myntri ka tnat ïalehkai u Bah Wailadmiki Shylla, sha u Commissioner and Secretary jong ka tnat ïalehkai u Vijay Kumar, sha u Director ka tnat ïalehkai ban kyntu ïa ki ban pynrung lem ïa kane ka jingïalehkai ha ka National Games.
Shuh shuh u la ïathuh ba ki la ai da ka jingthoh sha u Bah John F. Kharshiing, Bah F. Pariat bad ruh sha u Lat ka Jylla, hynrei sngewsih ba ka Sorkar kaba lamkhmat da ka NPP kam shym la kheiñ snep bad leh bym suid ñiew haduh mynta.
U la ong ba ki la trei shitom ban ai ka jinghikai kaba bha tam na ka bynta ki khynnah, hynrei sngewsih ba kam shym la urlong satia. U la ong ba u sngewsih ban pynpaw ïa ka kyrteng jong kiwei ki kynhun, hynrei um banse ban pynpaw ïa ka kyrteng jong ki kum ka Rugby, Lawn ball bad kiwei kiba haduh mynta kim pat ju ïohsngew, hynrei kane ka mih bad paw ka kyrteng na ka bynta kane ka National Games ka ban sa long ha u snem u ban wan ha ka Jylla.
U Bah Samuel u la ther tyngeh da kaba ong ba tang namar ba um don ha ka kynhun seng saiñ pyrthei kaba lamkhmat ïa ka Sorkar Jylla, kim shym la kheiñ snep, hynrei kiba don ha ka seng saiñ pyrthei ki ai ka jingithuh kloi, kum u Samla uba trei ban kyntiew ïa ki kam ïalehkai ki ïehnoh sha kyndong.
U la ong ruh ba imat ka la donkam ba ka sorkar bad ki kynhun kiba pher bapher ki dei ban pynthymmai noh ïa ki nongïalam jong ka MSOA lada ki dangneh kine kijuh ka kam ïalehkai ha ka jylla kan ym kiew lano lano ruh.
U la kynthoh ruh ïa ki nongïalam ka MSOA kiba mynjur da lade ïalade ha kaba ïadei bad ki synjuk ïalehkai ba ki bat kam, ban ïoh ïa ka pisa kaba la mang da ka sorkar, katba ki khynnah ki duh jingmyntoi.
Te kumta u la kyntu ïa ka sorkar khamtam ïa u Myntri Rangbah ka Jylla uba kum ka synjuk ïalehkai ka AMSA ka la aiti ïa ka shithi ba un shim khia ïa kane ka kam.
